MOKABAT sa 20 ka mga senior citizen ang nailad sa usa ka retirado nga empleyado sa City Hall sa syudad sa Cagayan de Oro human gipasaligan nga mahimo P12 mil matag bulan ang ilang P300.
Ang suspetsado naila nga Cres Nilles, 61, giingong nagdala sa pangalan sa City Hall.
Si Police Master Sergeant Neil Apolo Delas Alas mibutyag nga na-ingganyo ang mga senior citizen nga maghatag og P300 aron nga mamembro sa giingong foundation gumikan kay nagpatoo kini nga dunay koneksiyon sa buhatan sa City Hall.
Giingong ang P300 mamahimo kining P12 mil matag bulan ug duna pay house and lot.
"Allegedly nagrepresent siya sa City hall," matud ni Delas Alas.
Giingong pasakaan kini og usurpation of authority ug large-scale estafa karong Lunes, Hulyo 8, ilabi na nga wala kini mapakitang mga dokumento.
"So far, wala tay nadawat nga any documents to prove nga na register sila. In the absence ana nga mga documents, atong i-presume nga basig naka violate sila sa bala-od," dugang niini.
Samtang giklaro usab ni Konsehal George Goking, tsirman sa trade and commerce, nga daghang gipanganlan ang giingong pagpangilad ilabi na ang presidente sa organisasiyon sa mga senior citizen nga si Alfonso Goking ug nagpasalamat nga gi-aksiyonan gyud dayon ang maong incidente.
Ipaabot usab niini sa sesyon ang panghitabo aron nga mapahimangnoan dili lamang ang mga senior citizen apan ang tanan nga dili magpa-ilad ilabi na kung mga tam-is nga mga pasalig ug dili katoohang mga tanyag.
Gikasubo usab ni Goking ang susama niini nga mga panghitabo ilabi na lakip ang mga senior citizen ang gibiktima.
"Why the senior citizen's sector? The P300 is a lot of money, mao na ipalit nila sa mga tambal so ayaw lang tawon," matud ni Goking.
Giingong dako ang pagtoo niini nga laing "scam" na usab kini ug buot usab niini nga magpatawag og panagtigom aron nga ma-update ang mga "scam" nga gakahitabo sa siyudad.
Samtang gibutyag sa suspek nga dili kini pagpangilad tungod kay giingong rehistrado sa duha ka mga dagkong bangko sa nasud.