ALAS dos sa hapon. Sulod sa daw palasyo niyang panimalay nagpahiyom si Sonia nga nagsigeg tan-aw sa iyang ‘tablet.’ Mahimuot siyang magtan-aw sa mga kaila niya sa ‘Facebook.’ Mo-like siya panagsa. Apan may mga ‘account’ nga di siya mo-like. Igo lang siyang motan-aw kay dili niya mga higala ang nag-download. Nakaila lang siya kanila tungod sa usa ka lalake. Nasubay man god niya nga ang kanhi nangulitawo kaniya nga si Rudy, abogado na. Malipayon kini sa iyang kaminyuon ug may duha ka anak puros babaye. Nangaminyo na sab sila. Nangapo na si Rudy.
Sa iyang bahin, si Sonia haruhay kaayo sa iyang kinabuhi. Wa siya kaagi og kalisod ug nagpuyo ning dakong mansiyon. Maglabi ang panahon nga siya nag-inusara. Mga ‘maid’ ra kanunay nga makauban. Kaduha sa usa ka tuig mouli ang iyang bana nga si Tony, usa ka kapitan sa barko. Wala silay anak kay baog si Tony nga miagig sakit sa babaye. Alang kang Sonia, laay kaayo ang iyang kinabuhi.
“Unsa kahay akong kinabuhi kon ako pa siyang gisugot?” pangutana ni Sonia sa iyang kaugalingon nga naghunahua kang Rudy. Naglingkod siyang nagpanglantaw sa mga bilding sa siyudad sa ubos ning bungtod nga gitarukan sa mansiyon.
Nahinumdom siya nga kulang na lang moluhod si Rudy sa iyang atubangan aron iyang sugton. Trayenta ka tuig na ang nakalabay. Desidido si Rudy nga mangasawa kaniya. Makigminyo dayon si Rudy kaniya kon sugton lang, apan wa pa sa hunahuna ni Sonia ang pagminyo adtong panahuna. Si Rudy nagtungha pa sab adtong higayuna nga ‘self-supporting student.’ Nagtrabaho kini sa bupete sa usa ka abogado. Ug bisan unsa na lang ang raket aron makakuwarta; kugihan kaayo.
“Kon maminyo ta, magkalisudlisod gyud hinuon ta. Apan tim-os ug matinud-anon nga gugma akong igarantiya. Mahitungod sa kuwarta, moingon lang ko, ‘God provides’. Moabot da ang kuwarta kon kinahanglanon,” matod ni Rudy usa ka hapon nga namisita siya kang Sonia.
Nakagusto unta si Sonia kang Rudy. Maayo kinig hitsura ug buotan, apan nahadlok siya nga mosugal sa way kaseguroan nga paningkamot ni Rudy. Gipili niya si Tony nga kapitan sa usa ka ‘overseas’ nga barko.
“Husto si Rudy. God provides!” tuaw ni Sonia. Ang asawa ni Rudy nahimong certifified public accountant (CPA) nga si Rudy ang naggasto sa pagtungha niini. Ang ilang kinamaguwangang anak nga babaye, maestra, nga naminyo og maestro. Ang ikaduhang anak babaye, board topnotcher sa ‘Interior Designing’ ug nakabana og arkitekto.
Mihapdos ang dughan ni Sonia sa pagmahay. Mitindog siya. Milakang paingon ngadto sa dakong kabinet nga gisudlan ni Tony sa mga ‘imported’ nga bino nga iyang ‘collection.’ Giablihan niya ang kabinet. Gipagawas ang usa ka botelya. Lumsan niya ang kalaay sa iyang kinabuhi. (KATAPUSAN)