KADAKO diay sa damage sa tudlo ni Liza Soberano kay gihiwa sad og apil ang iyang bat-ang.
Ang doktor didto kuno nikuha og bukog sa iyang bat-ang aron maoy ihulip sa patay niyang bukog sa tudlo. Kasakit ana.
Mao tingaling human sa operasyon matod pa ni Enrique Gil wa kuno kaila dayon si Liza niya.
Makita sa litrato ni Liza sa iyang Instagram nga gibutangan og puthaw ang sud sa iyang tudlo. Ngilo kaayo tan-awon kakita mo?
Ako untang ibutang dinhi sa Laysho pero wa na lang kay medyo sensitibo ang maong mga litrato.
Pero di kaha ni makaapekto sa confidence ni Liza inig atubang na niyag balik sa camera? For sure di na gyud siya puwede mag-action.
“Better Wife”
Bilib ko sa estorya sa bag-ong teleseryeng “The Better Wife” sa GMA.
Di sad malalis ang nagkainit nga chemistry ni Andrea Torres ug Derek Ramsay.
Bisan sa ilang guesting niadtong Dominggo sa “The Boobay and Tekla Show” mas lingaw sila kaysa kaatbang nilang GGV nga puros mga binalik na ang episode sa “Best Paandar.”
Gipangutana ni Boobay ug Tekla si Andrea ug Derek kon duna ba kaha’y purohan nga ma-develop sila apan nangatawa ra.
Sa akong tan-aw ni Andrea maora’g naka-like sad. Mobisita kaha ni silag Cebu? Atong i-text si Miss Irene beh!
Love Yourself
Nakadawat ko og late invitation pinaagi sa Facebook kay naa si Miss Universe 2015 Pia Wurtzbach niadtong Sabado alang sa fashion event nga gitawag og “Etuf: Cebu’s Premier Fashion auction for HIV/Aids advocacy” nga gihimo sa Events Space sa Mabolo nianang pagkagabii.
Lakip sa guest performers ang international Cebuana singer-songwriter ug LoveYourself ambassador Karrencitta.
SunStar
Mga pahasubo sa banayng Duhaylungsod sa pagtaliwan sa ilang mama Lita Duhaylungsod.
Si Manang Lita mao ang unang concessionaire sa canteen niadto sa SunStar ug biyuda sa labing unang supervisor sa SunStar niadtong 1981 nga si Radi Duhaylungsod. Ang haya naa karon sa St. Peter sa Imus. Salamat sa inyong kaayo. Ayo-ayo sa pagpanaw, Nang Lita.