NAKAPALIG-ON ni Bise Mayor Mike Rama nga anaa na ubos sa iyang direktang liderato ang upat ka mga komitiba sa Konseho sa Syudad sa Sugbo.
Nagkanayon si Konsehal Raymond Garcia nga kini unang nahitabo pa karon. Wala man say probisyon sa balaod nga nagdili niini.
Mao nga karon, si Bise Mayor Rama mao nay chairman sa Committee on Environment and Natural Resources; Committee on Sister Cities Relations and Big Brother Program; Committee on Tourism, Arts and Culture; ug Committee on Health, Hospital Services and Sanitation.
Kon tan-awon nato pagtarong kining maong mga komitiba, mas modako ang tingog ni Rama diha mismo sa mga dagkong proyekto nga maglambigit og kinaiyahan sama pananglit kabahin sa basura ug tubig, mga tourism project labi na ang Sinulog, ug kining mga nalambigit sa panglawas nga epektibo kaayo sa pagdani og politikanhong suporta gikan sa masa.
Abi nako nga negatibo kang Rama kining pagka-disqualify ni Sherwin Luie Abella isip nuisance candidate kay dako karon ang posibilidad nga makasulod sa Konseho si Marie Velle “Amay” Abella ug matagak si Konsehal Philip Zafra.
Sa laing anggulo, kon madayon kining pagka sulod ni Abella, mahimong 9-9 na ang ihap sa mga konsehal nga Barug ug BOPK.
Na-disqualify si Konsehal Andales ug Arcilla busa nakasulod si Konsehal Gerry Guardo ug Konsehal Joel Garganera.
Nakahibawo na man kita nga si Guardo nipadayag na og suporta kang Mayor Edgar Labella. Dayon nisunod sa pagpadayag og suporta si Konsehal Dave Tumulak.
Sa ingon niini nga kahimtang, duna nay 10 ka konsehal ang Barug samtang walo na lang ang BOPK.
Apan, mausab kini kon modesisyon ang Commission on Elections (Comelec) nga makasulod na sa Konseho kini si Amay Abella ilis kang Konsehal Zafra.
Bisan pa man, momahal ang papel ni Bise Mayor Mike Rama kay siya na man ang mobotar kon magtabla ang mga boto sa mga konsehal. Kinahanglan si Rama “to break the tie” sa Iningles pa.
Sa ingon niini nga kahimtang, mas kinahanglanon ni Mayor Labella si Bise Mayor Rama aron masuportahan sa Konseho ang iyang mga programa ug proyekto.
Kiha
Akong gibalik sa pagtan-aw ang isyu kabahin sa pagguba ni kanhi mayor Tomas Osmeña sa iyang opisina ug nahibulong gyud ko nganong giapil ang mga trabhador sa Dakay Construction sa kiha.
Nailhan man gud kining Dakay Construction nga ligdong nga kompanya. Ang tag-iya niini nga si Pericles Dakay maoy presidente sa Sinulog Foundation ubos sa lain-laing administrasyon. Buot ipasabot, na-maintain niya ang political independence. (@anol_cebu sa Twitter)