Espinoza: Tubig sa mga golf course palimpyuhan

BASURA. Bisag asa nga dapit ning atong nasud, ang usa sa mga nag-una nga problema mao ang basura. Di lang ni problema sa atong mga lider ug tinudlo nga mga opisyales sa kagamhanan, apan problema sa katilingban ug sa katawhan nga walay pagtan-aw sa atong kaayohan ug panglawas ingon man sa atong palibot.

Matod pa ni DENR Secretary Roy Cimatu, sa iyang mubo nga mensahe sa awarding human sa usa ka torneyo sa golf nga gipahinugod kaniya atol sa iyang adlawng natawhan niadtong Sabado sa Navy Golf Club, Taguig City, ang mga informal settlers ang usa sa mga tinubdan sa daghan nga basura tungod kay dili masulod sa basurero ang ilang mga dapit mao nga adto ra ilabay sa estero ilang basura.

Hinuon, ang gipasabot ni Secretary Cimatu mao ang Metro Manila nga ang kadaghanan sa mga informal settlers tua didto ug naa namuyo sa kilid sa mga estero diin didto lang deretso ilabay ang ilang mga basura. Naa man sad tay mga informal settlers dinhi Sugbo apan dili sama kadaghan didto sa Metro Manila.

Gani, mi-orden si Cimatu nga ipalimpyo usab ang mga katubigan sulod sa mga golf course nga iya sa militar sama sa Villamor Golf Club, nga gidumala sa Philippine Air Force ug Navy Golf Club, nga gipadagan sa Philippine Navy, ug uban pa tungod kay nakita ni Cimatu nga hugaw kaayo ang mga tubig nga anaa sa mga kanal ug pond sa golf course.

Pung pa ni Cimatu nga kon hugaw ang tubig diin kini nagsugod, hugaw usab ang tubig nga molahus didto sa mga kasapaan ug suba unya molahus na ni didto sa kadagatan. Tinuoray, kay mag-unsa man ang sige og limpyo sa Manila Bay unya ig unos o bunok sa uwan ang tanan basura gikan sa mga kadalanan, sapa, suba adto ra gihapon sa dagat motapos.

Ang dakbayan sa Sugbo ingon man sa silinganan nga dakbayan sa Mandaue ug Lapu-Lapu nakasinati usab sa susama nga problema sa basura sa Metro Manila. Usa sa mga hinungdan tungod kay ang dakbayan way kaugalingon nga sanitary landfill nga gilagda sa RA 9003 kon Solid Waste Management Act.

Ang lain dako nga hinungdan sa basura mao ang kakuwang sa disiplina sa kadaghanan sa atong mga kaigsoonan. Naa sad tay balaod nga nagdili sa paglabay sa basura o hugaw bisan asa apan walay mopatuman sa maong balaod. Sa ako na nga gisulti sa unahan, kita mismo dunay dako nga responsabilidad sa pagmentinar sa kalimpyo sa atong palibot.

Ang nakaporki pud kay dunay mga pulitiko nga imbis ipatuman ang balaod sa paglimpyo sa ilang nataran ingon man sa pagbutang sa basura sa gawas atol ug tumong sa adlaw sa paghakot sa basurero, bayloan na hinuon og pagkaon ang ilang basura mao nga giabusohan sa mga walay disiplina.

Ig-abot sa panahon nga wala nay pagkaon delata nga ibaylo sa basura tungod kay nahurot ang pundo, ang sunod mahitabo nga ilabay na lang sa kanal o sapa ang ilang mga basura. Di ba sayop nga pamaagi?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph