DILI kompleto ang inaugural session sa ika-15 nga Sangguniang Panglungsod sa dakbayan sa Lapu-Lapu nga gipahigayon niadtong Biyernes, Hulyo 5.
Kini human nga unom sa mga piniling konsehal sa niaging piniliay sa maong siyudad ang wa motunga o wa makatunga sa maong kalihukan nga mao untay magsilbing lihi sa boluhaton isip magbabalaod sa ilang bag-ong termino.
Ang unom nga pulos kaalyado ni kanhi mayor Paz Radaza nga karong kongresista na mao sila si Rex Mangubat, Rudy Potot, Flaviano Hiyas, Jose Dungog ug ang duha ka mga ex-officio members nga si Sangguniang Kabataan Federation president Laika Tampus ug Association of Barangay Council president Eduardo Cuizon.
Sa sayo pa, ang bag-ong napiling mayor nga si Junard “Ahong” Chan, ang higpit nga political rival sa mga Radaza, mibutyag nga nakadawat siya og impormasyon nga ang mga konsehal nga sakop sa Team Deretso mo-boycott sa inagurasyon.
Kini tungod sa iyang plano nga iyang kuhaan og opisina si Cong. Radaza nga anaa sa City Hall building.
Pero gipanghimakak kini ni Konsehal Ricardo Amores, kaalyado ni Radaza nga nakatambong sa maong session.
Nasuta usab nga ang unom nga mipalta nakapadala og suwat ngadto ni Vice Mayor Celedonio Sitoy nga nagpahibawo nga dili sila makatambong tungod sa ilang tagsatagsa ka prayoridad.
Balido man o dunay nagpahipi nga kolor sa pulitika ang ilang mga rason pero hinaot nga matuhop usab ngadto sa ilang alimpatakan ang giingon ni Amores nga ang pagtambong sa session maoy usa sa obligasyon nga ilang gisaad ngadto sa mga Oponganons ilabi na sa mga mipili kanila sa niaging mid-term election.
Buot ipasabot ni Amores nga ihikling unta ang pamolitika ug sugdan na ang serbisyo ngadto sa katawhan kay kini maoy tinud-anay nga katuyo-an sa inyong pagdagan.