GIPADALA sa usa ka tigmina sa tunga-tungang habagatang Sugbo ang usa ka medical mission sa unang higayon sa Sibago, bukirang barangay sa Pinamungahan, nga miatiman sa 424 ka mga lumolupyo nga maglisud makapatagad sa gipamati sa kalawanan.
Miatiman sa 160 ka mga hamtong ug 152 ka mga bata sila si Dr. Ildebrando I. Estella uban sa iyang asawa nga si Dr. Easter Lette ug Dr. Normacita Y. Infantado didto sa Sibago Elementary School atol sa maong misyon nga gipahigayon sa Solid Earth Development Corp. (SEDC).
Gisusi sab sa usa ka optometrist ang mga mata sa laing 112 nga miuli dala na ang atipara matag usa nila, matod ni Mitzie Almira I. Carin, tagduma sa SEDC alang sa human resources and administration.
Miabag sa misyon si Kapitan Paulino B. Canoy sa Sibago uban nilang konsehal Juan Candole ug Pedro Canoy ug barangay health workers gikan sa pagpalista sa mga pasyente hangtud sa pagpahigayon sa misyon ning bag-o pa lang.
Nahimuot sa kahigayunan, gikutlo ni Tarsiana Barnido, 70, nga wala’y ospital o farmacia duol sa Sibago. “Moadto pa mi sa lungsod kung mopalit og tambal,” siya mipadayag.
“Daghan na kaayo ko og sakit nga gipamati. Kung masakit ko, moadto pa ko’g Tabunok. Dako pa gyud kaayo og gasto,” siya mipasabot.
Gikalipay nila Barnido ug sa iyang mga kasilinganan nga mipadala ang SEDC og medical mission sa ilang barangay. “Nakapa check-up na mi, ug nakadala pa mi og mga tambal ug bitamina nga libre,” siya mipaahibalo.
Gilauman ni Gloria Pauner, 72, nga padayong mopahigayon ang SEDC og mga misyon ug ibalik ra sad unya kini sa dili madugay sa Sibago “para daghan pa ang matabangan.”
Na-stroke si Armando Barnido, 49, sa miaging tulo ka tuig, maglisud hangtud ron sa pagsulti ug paglakaw. Mipadayag alang niya ang iyang anak nga layo ra ang Sibago sa usa ka ospital, “maong usahay wa’y kapili-an ug agwantahon na lang sa mga tao ang gipamati nga sakit.”
Samtang gilauman ni Lola Tarsiana nga sa sunod nga misyon pohon malakip unya ang mga ginagmay’ng operasyon para ipatangtang niya ang cataract sa iyang mga mata, gadahom sab ang anak ni Armando nga apilon unya ang tuli, mitaho si Zeny Tapuyao, community relations coordinator sa SEDC.
Katulo na nga higayon nga mipahigayon ang SEDC og medical mission sa bukirang bahin sa Pinamungahan, una sa Abril 2016 nga miatiman sa 856 ka mga pasyente gikan sa siyam ka mga barangay, dayon sa Abril 2017 nga mialagad sa 732 ka mga lumolupyo sa barangay Anislag ug Duangan.
Uban sa Taiheiyo Cement Philippines, Inc. (TCPI), mipadala usab ang SEDC og nahiunang misyon sa duha ka mga barangay sab sa Pinamungahan pagka-Marso 2013 uban sa pakig-alayon ni kanhi Bukal Alex Binghay nga mitagad sa 642 ka mga mga residente.
Ipadagan unya sa SEDC ang usa ka minahan sa silica sa wala ra puy-i’ng bahin ibabaw sa Pinamungahan nga gamiton sa paghimo’g semento sa planta sa TCPI diha sa South Poblacion, San Fernando. (PR)