ANG Cebu City Government mopairog sa walo ka mga haligi sa Il Corso nga nagpatong sa kilid sa karsada nga gi-develop sa Filinvest Land Inc. (FLI) sa South Road Properties (SRP).
Si Joel Dauz III, bag-ong SRP manager, nagkanayon nga kini maoy usa sa kagustohan ni Mayor Edgardo Labella human sa giingong wa pagtuman sa FLI sa setback.
“Ang sulti sa mayor, I have to ask Filinvest to comply with the setback provided by law kay klaro man kaayo nang ilahang mga columns diha nga wala mo-follow sa setback,” matod ni Daluz.
Gikinahanglan unta nga ang setback adunay distansiya nga lima ngadto sa 10 metros gikan sa kilid sa karsada paingon sa edepisyo nga gitukod.
Nakita nila ni Daluz nga nakalapas niini ang Il Corso.
Apan si Daluz nagkanayon nga dili sila modangop sa korte, inay mohimo sila og sabotsabot.
“We have to implement the law equally to everybody, sa mga locator nato diha sa SRP. I just want to talk to them unsaon ni nato pag-implement without going to the court because we have also to protect our locators,” dugang sa kanhi konsehal.
Samtang, ang FLI bukas aron makigsulti sa Siyudad kalabot sa giingong paglapas.
Matod sa pamahayag niini nga gipadala sa SunStar Cebu, ila nang natubag kining mao nga problema.
“FLI is open to discuss the alleged encroachment, which has been previously addressed. FLI reiterates that the said structure is in fact part of the foot bridge crossing the SRP highway, that FIlinvest will build and maintain for the city government for the convenience of the public,” matod sa FLI.
Si Daluz nagkanayon nga kinahanglan nga ipatuman ang balaod alang sa tanang locator o investor diha sa SRP.
Niadtong 2017, si kanhi mayor Tomas Osmeña nimando sa management sa SM Seaside City nga ipatuman ang setback habig sa Vestil road.
Kini gituman sa SM apan wa nila mapabalhin o mapasibog ang Cube nga giapil sa pagmando sa kanhi mayor.
Ang SM Prime Holdings Inc. ug ang FLI maoy labing una nga mga investor sa SRP human gisugdan og baligya sa City Government kapin na sa usa ka dekada ang nakalabay.
Ang FLI kinsa nakapalit sa 19 gikan sa 46 ektarya nga yuta sa SRP niadtong 2015, nisanong sa panawagan ni Osmeña nga kanselahon ang ilang nasudlan nga kontrata tali sa City Hall.
Samtang ang SM, kinsa consortium sa Ayala Land Inc. nga maoy nakapalit sa 26 ektaryas, waa nagpadala sa kanhi mayor.
Si Daluz niingon nga subay sa pamaagi sa bag-ong administrasyon, di na sila mamaligya og yuta.
Inay, modawat sila og mga tanyag sa abang o lease gikan sa mga locator.
Kon aduna may ibaligya, kini mao ang tulo ka ektarya nga luna nga gihimoan og city ordinance.
Nalatid sa mao nga ordinansa ang presyo matag square meter nga di mominos P110,000.
Ag kanhi administrasyong Osmeña pakyas sa pagbaligya human sa katulo nga public bidding.
Si Daluz nagkanayon nga sa iyang pagdumala sa SRP, daghan pa og gikinahanglan nga palambuon sama sa paghimo og laing exit point sa mga sakyanan.
Iyang napanglantawan nga mohuot ang dagan sa mga sakyanan sa umaabot nga katuigan.
Butangan usab kini og maayong drainang facility ug daghan pang uban.