MAHITABO kaha karong adlawa ang giingon sa Rigen Wellness 2.0 nga "massive disbursement of cash incentives/payouts."
Sa reyalidad, nag-alingasa gyud ang katawhan kinsa naghulat nga mahitabo kini gumikan sagad sa mga investors sa Rigen milapas na og usa ka bulan ang pagbutang sa ilang kapital, buot ingnon sila ang anaa sa listahan sa mga backlog kun nadilatar.
Nalipay ang mga investors human gipagula pinaagi sa Facebook Page sa Rigen Wellness 2.0 ang usa ka infographic diin nagpahibalo unsay katikaran sa maong investment scheme.
Alang kang Maricel (bansagon gipatago), 34-anyos, taga Barangay 31-D, Roxas Extension, Davao City nga maayo unta kung matinuod kini nga pahibalo sa Rigen aron makuha niya ang iyang gi-invest diin maoy halin sa yuta nga ilang nabaligya sa Governor Generoso, Davao Oriental.
"Maayo lang unta og matinuod kini, dili lang unta puro istorya ning Rigen, kay dili lang ako ang nakulbaan sa dangatan sa salapi, daghan og sama nako," ingon ni Maricel.
Positibo sab si Helen, 57-anyos nga taga Jacinto Street, Davao City diin alang niya, mabalik gayod ang kuwarta nga iyang na-invest.
"Mosalig ko sa Rigen kay naka-payout naman gud ko ani, kaya lang ning bag-o na-delayed gyud, hapit na magduha ka bulan ang akong ikaduha, wala nako ka payout, basin diay karong Hulyo 9 man ka ha?" ni Helen nga nahinabi sa Superbalita.
Kung mahitabo nga dunay payout apan wala ra sa diyes porsiyento ang na-payout-tan gikan sa kinatibuk-ang ihap, unsa nalang ka ha ang mahitabo?
Magmakalmahon nalang kita ugaling dili maapil sa payout, kay kining tanan kabahin sa atong pagpanugal.
Likayan lamang ang paghimo og dautang lakang batok sa mga agents ug sub-agents gumikan sila biktima ra sab, bisan paman nga nahimo silang behikulo niini.
Mag-ampo nalang kita kung unsay lintunganay ning tanan, ug aron mahupay ang kabalaka ug kadismaya diha sa atong dughan.