SA GITAKDANG pagsugod sa usa ka bulan nga kasaulogan sa 34th Kadayawan sa Dabaw sa Agosto 2, daghang mga kausaban sa tinuig nga kapistahan ang mahitabo.
Pipila kanila mao ang paglahi sa Indak-Indak sa Kadalanan street performance ug Pamulak Kadayawan floral float parade sa managlahi nga semana.
Ang Indak-Indak himuon na sa Agosto 17, samtang ang Pamulak sa Agosto 24.
Kaniadto, Indak-Indak himuon sa buntag sa Sabado, samtang ang Pamulak sa Dominggo sa buntag sa sunod adlaw.
"Unlike in the previous years that we put all the events in one week, we will spread it out for the entire weekend of August," tug-an ni City Tourism Operations Officer (CTOO) head Generose Tecson atol sa Kadayawan media launching sa DusitD2 Hotel Davao niadtong Lunes, Hulyo 8.
Si Tecson, kinsa nagsilbi isip festival director, nagsulti nga ang kausaban sa kalihukan gihimo alang sa mga turista aron nga makabaton og igong panahon nga mausisa ang dakbayan.
Matud sab niya, "this will give Dabawenyos a diferent experience and to entice more visitors."
Tinguha ni Tecson nga ang dakbayan mohatag sa mga bisita og "good stay" tungod kay mga hotel ug uban pang mga akomodasyon puno kaayo, base sa ilang pagsusi gikan sa niaging mga kasaulogan sa Kadayawan.
Base sa datos sa CTOO sa milabay nga tuig, ang siyudad nitala og kinatibuk-ang 208,645 tourist arrivals, apil ang lokal ug langyaw. Kini base sa hotel occupancy.
Ang pangulo sa turismo dugang nagsulti nga ang siyudad nagtarget og 250,000 turista ning tuiga kon diin ang badyet karong tuiga sa Kadayawan moabot og P70 milyon tungod sa pagtaas sa premyo, uban sa buhis sa nagkadaiyang mga kompetisyon sama sa Indak-Indak.
Samtang si Mayor Sara Duterte-Carpio nitambong atol sa media launching, uban sa lain pang mga importanteng mga opisyal sa siyudad ug bisita.
Sa pagpamulong ni Duterte-Carpio, siya nag-awhag sa Dabawenyos "to go out and celebrate".
Samtang si Davao City Chamber of Commerce and Industry, Inc. (DCCCII) president Arturo Milan, kinsa nagsilbi isip festival co-chairman, nagsulti sab nga ang selebrasyon sa tibuok katuigan nahimong lig-on, pinaagi sa pagpakig-partner sa nagkadaiyang publiko ug pribadong sektor.
Alang sa listahan sa tibuok kalihukan karong tuiga sa Kadayawan, mahimong i-tsek ang official Facebook page sa Sunstar Davao. (Cristita Canoy/MSU Intern uban sa taho ni Ralph Lawrence Llemit)