DAVAO DEL SUR -- Gipakusgan sa Davao del Sur Police Provincial Office (DSPPP) ang kampanya batok terorismo.
Aminado si Police Colonel Alan Manibog, police provincial director, nga wa'y gipiling dapit ang hulga sa terorismo mao nga gikinahanglan ang kanunay'ng pag-igmat.
Matod ni Manibog nga kinahanglan nga angayang dili magkompyansa sa mga gipasagdang bagahe, karton o bag sa mga publikong lugar.
Giabisohan sab niini ang publiko nga motabang sa pagbantay sa palibot aron luwas ang ilang seguridad.
Usa sa mga timailhan sa mga butang nga aduna'y bomba mao ang pagkaputos og dasuk kaayo nga pagka-empake nga mga bagahe o parsela, nagmantika o adunay lama sa grasa nga anaa sa sobre o sa putos.
Sumala sa kapolisan nga ang mga kadudahang bomba aduna sab huni nga daw susama sa tinagiktik sa orasan nga nagagikan sa sulod sa bagahe, kahon o bag o di kaha aduna'y presensya sa mga wire sa kuryente, “plastic cords” ug mga baterya sa mga bagahe, kahon o bag.
Dugang pahimagno nagkanayon nga angayang susihon ang mga ibilin nga package o bag, knapsack, kahon, mga pakete sa baligya, ug uban pa nga dala sa tanang tawo nga musulod sa mga malls, sinehan ug uban pang balay-patigayon/establisemyento.
Maampingong paghiling sa mga kaduda-dudahang mga pakite, bolsitang papel ug uban pang susamang pakite.
Si Manibog midason nga kanunay'ng ibutang sa hunahuna sa matag usa nga ang mga bomba pwede himoon nga bisan unsang porma ug matang sa butang; ug nga kini pwede ibutang o i-deliver sa bisan unsang mga pamaagi.
Angayan sab nga pahibaw-on dayon ang pinakaduol nga kapolisan sa takna nga mabantayan kining mga butanga aron luwas ang matag indibidwal.
Kahibaloang nakalusot ang usa ka bomba sa kampo sa militar didto sa Indanan, Sulo niadtong Hunyo 28, mao nga nakaelerto ang kapolisan sa lukop lalawigan.