GIBUTYAG ni Fiscal Ruso Zaragosa sa Lapu-Lapu City Prosecutor’s Office nga dili ra makaapekto sa kasong ilang gisang-at sa akusadong si Renato Llenes ang nag-ung-ong nga pagbalhin sa laing assignment ni Lapu-Lapu City Police Office (LCPO) director Police Colonel Limuel Obon.
Kini ang gipahibawo sa fiscal human nga si Obon mao na karon ang nagsilbing complainant sa kasong murder nga giatubang ni Llenes human sa iyang linuog nga pagpatay sa dalagitang si Christine Lee Silawan.
Ang ginikanan sa dalagitang si Christine Lee wala mopirma sa affidavit sa kasong gisang-at batok ni Llenes hinungdan nga si Obon na lang ang nibarog isip complainant sa kaso hinungdan nga nigawas ang mga kabalaka sa pipila kun dili ba maapektohan ang kaso sa iyang pagbalhin gawas sa jurisdiction sa dakbayan sa Lapu-Lapu.
Si Obon gikatakdang hulipan na sa katungdanan ni Police Colonel Clarito Baja isip direktor sa LCPO.
Sa pagkakaron, magpabilin pa hinuon si Obon sa Sugbo sanglit adto raman siya idestino unya sa Police Regional Office (PRO-7).
Wala pa usab hingpit nga mahulipi si Oboni isip director sa LCPO sanglit wala pa usab moabot ang kamandoan gikan sa Camp Crame.
Matod ni Zaragosa mahimo rang mapadal-an ug subpoena si Obon aron makatambong sa hearing kun ugaling asa siya madestino sa nasod mabalhin butang nga normal ra gayud sa trabaho sa usa ka pulis.
Gihimong basehanan ni Zaragosa ang mga kasong gihuptan sa mga pulis sa bisan asang suok sa nasod nga magpadayon gihapon sa korte bisan ug ang usa ka pulis nagbalhin balhin usab og assignment.
Giangkon hinuon ni Zaragosa nga importante gayud ang papel ni Obon sa kaso nga giatubang ni Llenes sanglit gawas nga siya ang complainant sa kaso usa siya sa mga witness sa kaso sanglit siya ang nasayod kung unsa ang dagan sa ilang imbestigasyon nga miresulta sa ilang pagtaral ni Llenes sa hukmanan.
“Wala gyud nay problema mao bitaw kanang mga pulis karon nga tua na sa Abra, Mindanao ug asa pa na ang amo mga subpoena ana adto rasad namo ipadala,” pagpasabot ni Zaragosa. (GCM)