GIBALIK sa pwesto ni Gobernador Gwen Garcia si Emme Gingoyon isip Provincial Budget Officer (PBO) sugod niadtong Lunes, Hulyo 8.
Ang gobernador niisyu og Administrative Order No. 01-2019, pinetsahan og Hulyo 5, 2019, nga nagtugot kang Gingoyon nga mabalik sa maong posisyon human kini mangayo og rekonsiderasyon.
Niadtong Mayo 30, 2019, si kanhi gobernador ug karon Bise Gobernador Hilario Davide III niisyu og kamandoan nga nagtangtang kang Gingoyon sa listahan sa mga empleyado sa Kapitolyo.
Ang Ombudsman nitaktak ni Gingoyon ug Provincial Health Officer Christina Giango niadtong Nobiyembre 11, 2015 isip mga miyembro sa Bids , and Awards Committee (BAC) sa miaging administrasyon ni Garcia human makaplagi nga sad-an sa grave misconduct ug grave neglect of duty bahin sa katukoran sa kontrobersiyal nga Cebu International Convention Center (CICC).
Si Giango ug Gingoyon nidangop sa Court of Appeals, apan bisan kon pending pa, si Davide nideklarar nga bakante ang permanente nga mga posisyon sa pagka Provincial Budget Officer ug Provincial Health Officer.
Niadtong Mayo 31, 2016, si Rodas gitudlo ni Davide isip budget officer samtang si Dr. Rene Catan pagka provincial health officer niadtong Agusto 22 sa samang tuig.
Si Garcia nangayo sa legal nga opinyon sa Provincial Legal Office (PLO) nga nirekomendar nga tugotan si Gingoyon sa iyang hangyo nga rekonsiderasyon nga makabalik sa iyang pwesto.
Ang PLO nikutlo sa Korte Suprema sa kaso ni Jesus Gonzales batok sa Civil Service Commission (CSC) ug Philippine Children’s Medical Center nga ang appointing authority mahimo motudlo og balik sa empleyado nga gitangtang na sa listahan.
Ang PLO nirekomendar usab nga tugtan usab si Gingoyon sa iyang hangyo nga makuha og balik ang iyang sweldo dihang kini gitangtang ug ang ubang mga benepisyo subay sa pinal ug executory nga mga desisyon sa Court of Appeals niadtong Septiyembre 26, 2014 ug Pebrero 8, 2018.
Sumala ni Garcia mangutana siya sa CSC sa unsay mahitabo ni Rodas karon nga nabalik sa pwesto si Gingoyon.
“So, ang budget officer gyud under the law is Emme Gingoyon,” dason sa gobernador.
Si Rodas sa iyang bahin namulong nga mobalik siya pagka assistant budget officer isip maoy iyang orihinal nga plantilla.
“Naghimo ko og undertaking nga once mobalik siya, mobalik ko pagka assistant budget officer,” sigon ni Rodas dihang nihimo siya sa undertaking niadtong 2016 isip budget officer.
Tungod sa pagtudlo kang Rodas ug Catan, si Davide ug kanhi bise gobernador Agnes Magpale ang gireklamo ni Garcia og illegal appointments ngadto sa Ombudsman sa kaulohan niadtong Disyembre 2018.
Apil sa nag-atubang og mga kasong kriminal ug administratiba mao sila si kanhi Provincial Administrator Mark Tolentino, kanhi human resource management offier Bonifer Nacorda, Catan ug Rodas.
Si Garcia nidugang nga gibalik niya sa pwesto si Gingoyon sanglit kini maoy iyang budget officer sa miagi niyang administrasyon.
Gawas kang Gingoyon, unang, gitudlo usab ni Garcia ang kanhi niya tagdumala sa Cebu South Bus Terminal nga si Carmen Quijano nga niretiro na sa serbisyo sa gobiyerno. (SCG)