KAPIN sa 10 ka mga tinun-an sa Can-asujan National High School sa Carcar City Cebu ang gipangtabang human kini naglisod sa pagginhawa.
Unang gituohang nasudlan og dautang espiritu, apan nakasinati ra diay sila og hyperventilation syndrome sa alas 11:30 sa Lunes sa buntag, Hulyo 8,2019.
Ang mga tinun-an nagagikan sa nagkadaiyang mga ang-ang sa junior high school.
Kini gilangkuban sa 15 ka mga babaye ug usa ka lalake base sa natala sa Carcar Provincial Hospital.
Human makadawat og taho ang kapulisan sa Carcar Police Station kabahin sa iniedente, daling nipadala og mga ambulansya ang City Disaster Risk Reduction Managemen Office (CDRRMO) and VNICE Carcar city.
Gipangdala ang mga tinun-an sa Carcar Provincial Hospital.
Matod pa sa imbestigasyon ni Police Corporal Francisco Saberon sa Carcar City police, nahitabo kini samtang anaa pa sa tagsa-tagsa nila ka mga klase ang mga tinun-an.
Si Jayne Pamela Te, supervisor sa nursing service sa Carcar Provincial Hospital, niingon nga maayo na ang kahimtang sa mga tinun-an.
Gani dunay uban kanila nga nakagawas, apan aduna pay nahabilin nga mga tinun-an nga ipailawom pa sa laboratory test aron masuta ang ilang kahimtang.
Matod ni Te nga sigon sa findings sa doktor nga niabag sa mga tinun-an, ang nasinati sa mga estudyante mao ang hyperventilation syndrome.
Unsa diay ni?
Si Dr. Rene Obra, pangu sa behavioral sciences sa Vicente Sotto Memorial Medical Center, niingon nga ang hyperventilation syndrome usa ka mass hysteria.
Matod niya nga motakod takod kini ngadto sa laing mga tawo nga naa sa palibot ug nakaobserbar sa hitabo.
Mopakita usab kini dayon og samang simtomas.
Ang angay buhaton kon kini masinati sa usa ka tawo, gikinahanglan nga magpakonsulta sa psychiatrist para maabagan og tambal sama sa anti-anxiety medicine. (Myla Tabio ug Jennylen Mabini, CNU Comm. Interns)