NA-FINALIZE na ang pagbalhin ni Kevin Durant gikan sa Golden State Warriors ngadto sa Brooklyn Nets kagahapon ug dungan sa iyang pagbalhin, mag-ilis na sab siya og numero sa iyang jersey gikan sa No. 35 ngadto sa No. 7.
Nahimo na sab nga opisyal kagahapon ang pagbalhin ni Kyrie Irving gikan sa Boston Celtics ngadto sa Nets, nga kalit lang nahimong title-contender sa umaabot nga season sa National Basketball Association (NBA).
Sa ilang pagpakigsabot sa Warriors, nakuha sab sa Nets ang 1st round pick sa 3-time champion sa sunod nga rookie drafting.
Isip baylo, nadawat sa Warriors gikan sa Nets sila si All-Star pointguard D’Angelo Russell, Shabazz Napier ug Treveon Graham.
Bisan dili pa makaduwa si Durant sa sunod season gumikan kay magpaalim pa kini sa iyang angol (Achilles tendon), makonsiderar gihapon nga usa ang Nets sa sayong mga paborito nga makalanglat og titulo gumikan kay ilaha man sab nakuha ang laing dekalidad nga magduduwa si DeAndre Jordan.
Daan nang nipabuhagay si Durant nga mopirma siya og maximum contract sa Nets nga molanat og upat ka mga tuig ug nagbalor og $141 million.
“Along with the rest of the league, our coaching staff has long admired Kevin’s incredible skill, resilience and tenacity,” matod ni Nets coach Kenny Atkinson.
“He has already established himself as a champion and one of the best players of all-time, and we couldn’t be more excited to welcome him into our program in Brooklyn.”
Kabahin sa iyang pag-ilis og numero sa iyang jersey, gipasabot ni Durant nga nagrepresentar kini og bag-ong pahina sa iyang kinabuhi isip basketbolista.
“35 was chosen in honor of someone very near and dear to me. I will always honor him and honor the number 35. But as I start this new chapter in my basketball life, the number I’ll be wearing on my back is the number 7 next time you see me on the floor. One time Brooklyn,” pamahayag ni Durant.
Gigamit ni Durant ang No. 35 dihang nag-edad pa lang siya og 16. Nagrepresentar kini sa edad sa usa sa iyang nahimong coaches kaniadto nga gipusil-patay sa Maryland.
Ang Nets naghinamhinam sab sa paghiabot ni Irving sa ilang tugkaran.
Ang 27 anyos nga si Irving nag-average og 23.8 puntos ug career highs nga 5.0 rebounds, 6.9 assists ug 1.5 steals.
“The entire coaching staff is excited to have the opportunity to coach a player of Kyrie’s caliber,” matod Atkinson.
“He’s as talented and accomplished as any point guard in our game and we are enthusiastic about integrating him and our other new roster additions into our returning core.” (AP, ESL)