IGO ra’ng nahiluna sa ika-14 nga dapit ang Gilas Pilipinas Youth human sila nakatilaw og laing kapildihan batok sa New Zealand, 76-70, sa katapusan nilang tahas sa classification stage sa 2019 FIBA Under-19 World Cup sa Greece niadtong Dominggo sa gabii (RP time).
Gihuman sa Gilas Youth ang kompetisyon nga aduna ra’y 1-6 nga rekord. Ang bugtong gilupig sa batan-ong Pinoy nga mga basketbolista mao ang China, 86-72.
Sakit alang sa Gilas Youth ang kapildihan gumikan kay naglabaw man unta sila og pito ka mga puntos, 68-61, sa tungatungang bahin sa 4th quarter.
Apan ninggukod ang New Zealand hangtod nga nakompleto nila ang misyon.
Gipangulohan sa Sugboanong si Carl Tamayo ang Gilas Youth pinaagi sa iyang 24 puntos ug 12 rebounds samtang ningdugang og 16 puntos matag usa sila si Dave Ildefonso aug Dalph Panopio pinaagi sa ilang 16 puntos matag usa.
Natawagan usab og unsportmanlike foul si Tamayo nga naghatag og duha ka free throws sa New Zealand.
Ang batan-ong higanti nga si 7’2” Kai Sotto igo rang nakadunol og walo ka mga puntos.
Mao kini ang labing unang higayon nga naka-qualify ang Gilas Youth ning maong kompetisyon sulod sa 40 ka mga tuig.
Mga puntos:
New Zealand 76 – Cameron 21, Darling 16, de Geest 15, Oswald 6, Perrott-Hunt 5, Higgins 4, Mete 4, Moors 3, Faamausili 2, Mennenga 0, Poppe 0, Stephens 0.
Philippines 70 – Tamayo 24, Ildefonso 16, Panopio 16, Sotto 8, Abadiano 2, Chiu 2, Oczon 2, Spencer 0, Amsali 0, Fortea 0, Torres 0.
Quarters: 20-15, 45-37, 59-58, 76-70. (ESL)