KANIADTO pa atong giduso kining pagtukod og multi-purpose nga pasilidad diin mahimong magamit isip sport center sa samang higayon evacuation center.
Sa atong sitwasiyon karon, dili tiaw ang nagkadaiyang kalamidad kanunay modagmal sa atong palibot.
Unya, tungod sa kakuwang og pasilidad sa gobiyerno, daghang pamilya nga apektado sa baha, sunog, linog, bagyo ang nagkatibulaag, nag-antos sa gawas nga walay kapasilungan.
Karon, ang Department of Public Works and Highways nagsugod na pag-implementar niining "one town, one evacuation center" nga programa.
Tumong niini mao ang pagtukod og pasilidad nga magsilbing gymnasium sa ordinaryong panahon apan magamit ingon nga evacuation center panahon sa kalamidad.
Gani, nagpadayon na karon ang DPWH pagtukod og 82 ka mga evacuation center ngadto sa kapin sa 52 ka mga probinsiya.
Mismo si Senator Ralph Recto ang niduso gyud sa maong programa aron mapundohan ug ikapatuman kini sa gobiyerno.
Haom kaayo kining programa tungod kay pagsulod sa bag-ong pamunoan sa matag probinsiya, munisipyo ug siyudad duna nay silay proyekto nga angay ipatuman.
Sa tinuod, iwit na kaayo ang Pilipinas sa paghimo og mga pangandam alang sa kalamidad taliwa nga kanunay tang giduaw og mga bagyo matag tuig.
Daghan pang angay himoon sa gobiyerno aron maserbisyohan nila sa hingpit kining mga biktima sa kalamidad. Sama pananglit sa pagkaon.
Sa ubang nasod, labi na sa Estados Unidos duna silay humanitarian daily ration o kining meal ready to eat kon MRE. Usa kini sa matang nga dinaliang hinabang ngadto sa mga biktima. Kining HDR mga preserved food kini sama sa ration sa mga sundalo.
Ang naandan gyud nato mao kining pag-apod-apod gilayon og noodles, sardinas ug bugas. Ang HDR o MRE dili na kinahanglan lutoon apan pwede siya initon sa iyang kaugalingog putos.
Unta mao kini ang tutukan kanunay sa gobiyerno ang paghatag og dinaliang ayoda ngadto sa biktima. Diha-diha nga hinabang sa pagkaon, kapasilungan, medical assistance, ug pagpabarog pag-usab sa ilang maguba nga gambalay.
Kanunay ning mga opisyal mogawas sa nasod alang sa educational tour kunohay patuon sa maayong sistema sa ubang nasod aron maaplikar nila sa ilang siyudad o munisipyo.
Dili na mo kinahanglan mobiyahi pa, i-research nalang ninyo kon unsang sistema ang gihimo sa ubang nasod pagtabang sa ilang katawhan panahon sa kalamidad.