HILIG ba nimong magpaabot sa pagsawop sa adlaw? Mag-emote?
Siguradong wagtang gyod imong problema kung huyohoy sa hangin ang motagbo kanimo ug overlooking nga talan-awon sa Cagayan de Oro ang nagpalibot kanimo.
Gawas niini, malingaw ug busog imong mga mata sa mga life-sized animals kon mananap nga nagpalibot lakip na ang mga buhing mananap nga nakakwadro.
Puno-puno sab imong photo gallery diha sa imong cellphone kay siguradong pang profile pic ang imong mga photos, instagrammable sab kaayo.
Dinhi lang kini nimo matagamtaman sa Noah's Arc o Arko ni Noah nga usa sa pinakahabog nga suroyan ug atraksyon sa Cagayan de Oro nga makita sa Indahag nga bahin ning siyudad, lakip as atraksyon sa Amaya View.
Kung mosaka ka sa arko, anaa ka nahimutang sa 1,122 feet above sea level ug dinhi sa pinakataas nga bahin makahugot ginhawa kon molantaw ka sa kahabog sa ubos. Dinhi sab nimo maeksperyensya ang pagsiga ug pagsalop sa adlaw.
Sa kantidad nga P50 nga entrance fee sa mga kids ug P80 sa adult, mabusog na imong mga mata sa tsada ug limpyo nga palibot. Limpyo sab ang ilang mga comfort rooms.
Susama sa akong mga kuhang hulagway, dili problema kung solo lang kang moadto ug gustong mag-emote, magyaka sa bermuda grass wala man sab gidili. Andama lang kanunay imong kuyog nga selfie stick!
Apan mas bibo ug alegre kung kuyog ang imong mga kabarkada, kaopisina, ug kapamilya.
Dili sab problema kung ikaw gigutom kay ang ilang Noah's Classic Burger mapalit lang sa kantidad nga tag P109 ug mga pagkaon nga dili na molapas sa kantidad nga tag P150. Affordable lang kaayo.
Matud ni Ysabel Cagalingan, usa sa part owner ug ga-manage niini, nga niadtong Disyembre 8, 2018 kini gibuksan sa publiko ug nagpadayon pa ang pagdevelop niini hangtod karon panahona.
Gipasabot sab niini nga safety ang ilang mga buhing mananap sa ilang mga tangkal sama na lamang sa duha ka mga dagkong tiger nga giingong mokaon og 20 ngadto 30 ka kilo sa manok matag adlaw. Aduna sab duha ka mga crocodile ug klase klaseng langgam.
Sa partikular nga dapit sa Arko ni Noah, mahimo sab kaayong mag overnight niini kay adunay mga hobbit rooms nga dili molapas sa tag P2,500 ang matag gabii. Biyahion lang kini og 30 minutos gikan sa sentro nga bahin sa siyudad.
Unsa pay gihulat! Laag na mga Ka Super!