BUOT sa tsirman sa National Union of Journalists of the Philippines (NUJP)-Cagayan de Oro nga subayon ang mga printing press aron masuta kung kinsa ang posibleng naghimo sa red-tagging diin dunay laing poster ang gibutang niadtong Hulyo 7 sa simbahan sa Iglesia Filipina Independiente sa Barangay Agusan, siyudad sa Cagayan de Oro.
Gibutyag sa tsirman sa NUJP-Cagayan de Oro nga si Pamela Jay Orias nga gikondena ang maong laing red-tagging ilabi na nga mabutang sa risgo ang kinabuhi sa mga anaa sa media.
"In the first place, atong trabaho mangita ra tag reports, atong i-report kung unsay tinuod. Dili ta kasabot nganong padayon na nilang ginahimo ug dangerous man gyud na siya atong kinabuhi ma put at risk kay wala ta kahibalo," matud ni Orias.
Giingong ilang suyoron ang mga printing press aron nga masuta ang naghimo niini ug kasohan ang angayang mapasakaan og kaso.
"Magkaso gyud ta para ato silang atubangon in the proper court, dili sa mga baseless lies," dugang niini.
Gibutyag usab ni Orias nga wala kini mahadlok nga i-red tag tungod kay nagtrabaho lang kini.
Nasayran nga dunay laing gibutang sa dingding sa simbahan sa IFI niadtong Dominggo nga nakabutang nga "NUJP, UPLM, NUPL, IFI, RMP. Accord Inc. undangi ang pagpahimulos sa Lumad ug bakwit ug ang pagsulong sa terorismo, Pari nga myembro sa teroristang ug demonyong NPA, NUJP, NUPL ihunong ang pagpangilad sa mga Lumad ug inosente sa inyong way pulos nga komunismong propaganda-MAT NMR."