ISA sa prayoridad sa bag-ong nilingkod nga city director sa Cagayan de Oro Police Office (Cocpo) mao ang mga menor de edad kinsa nalambigit sa krimen lakip na ang mga street kids kinsa anaa sa risgo ang kinabuhi diha sa kadalanan sa nagkadaiyang dapit sa siyudad sa Cagayan de Oro.
Gibutyag ni Police Colonel Henry Dampal, city director, nga isa gyud sa problema ang balik-balik nga sitwasiyon ilabi na ang pagkalambigit sa mga menor de edad sa krimen.
Giingong kini ang usa sa problema bisan asa nga mga lokal nga kagamhanan sa nagkadaiyang dapit ilabi na sa kakulangon sa pasilidad nga maplastaran sa mga menor de edad apan giingong suportado kini sa kapulisan nga kampanya.
"In our experience, magtuyok-tuyok ra ang cycle. Mangdakop ta og minors, i-turn over sa CSWD and then i-turn over sa parents balik napud. Siguro kana siya dili lang na concern nato but we are very much willing to assist CSWD," matud ni Dampal.
Gidugang pa nga usa kini sa prayoridad nga tutokan sa bag-ong city director ug hatagan kini og tukmang aksiyon.
"Isa na sa atong priority kay makita pud nato kay mag drive ta sa kadalanan daghan kaayo manuktok, usahay di na ta makabuylo kay atong masagasaan kita napud magkaproblema," dugang niini.
Nasayran nga usa usab kini sa buot ni Konsehal Romeo Calizo nga matutokan sa bag-ong city director sa Cocpo ilabi na nga susamang wala nay kahadlok ang mga menor de edad nga mohimo og krimen ilabi na nga nasayod kini nga dili mabilanggo.
Gani nakasaksi pa kini og menor de edad nga nanglabni og alahas diha sa Cogon area ug buot niini nga tutokan tungod kay gabalik-balik lang nga problema ilabi na nga daghan usab mga ginikanan nga susama usab nga walay mga disiplina.
"It could always be a cycle walay undang, kinahanglan lingkuran gyud na kinahanglan tagaan sila kanang kahadlokan kay sa karon di man gyud, mga isog kaayo," matud niini.