HUMAN sa laing giingong scam nga nibiktima sa ubay-ubay ka mga senior citizen buot sa tsirman sa trade and commerce nga hingpit na nga mamugna ang anti-scam task force.
Niadtong nilabay nga semana, 20 ka mga senior citizen ang nabiktima sa kanhi empleyado sa City Hall nga si Cres Nilles, 61, human nagpasalig nga motubo ang P300 matag bulan ngadto sa P12 mil ug nagpatoo pa kini nga dunay koneksiyon sa lokal nga kagamhanan sa siyudad.
Gibutyag ni Konsehal George Goking, tsirman sa trade and commerce sa konseho, nga i-insister niini nga mapagawas na ang maong task force aron matutokan ang maong problema.
"I will insist nga ipagawas na kay daghan na kaayo nanga affected," matud ni Goking.
Gidugang pa nga panahon na nga palig-unon ang maong grupo nga motutok niini aron nga hingpit na nga mapakgang ang nagkadakong problema sa mga pagpangilad ilabi na nga daghan kaayo ang nahitabong scam sa siyudad.
"It's about time that we revitalize this anti-scam task force para to monitor all scammers in Cagayan, It's a big problem now eh, people cannot see it but it's very obvious nga its getting bigger and bigger," dugang niini.
Nagpahimangno usab kini sa katawhan nga dili motoo gyud dayon sa mga tam-is nga pasalig aron malikayan nga nabiktima sa susama nga pagpamintaha sa isig katawo.
Posibleng ang mamahimong tsirman sa maong task force mao si Mayor Oscar Moreno, kinsa usab tsirmam sa Regional Peace and Order Council ug mao na ang mopili sa mga miyembro diin siguradong lakip niini ang kapulisan sa Cagayan de Oro Police Office, National Bureau of Investigation, ug uban pa.