Diputado: “Gubot pas lukot”

PADAYON nga gihasi ang hunahuna sa mga tawo bahin sa kahimtang karon ni Agriculture Secretary Manny Pinol.

Unsa man gyod kaha ang dangatan ni Pinol?

Matod pa sa mga balita, mogawas na sa DA si Pinol unya hayan siya maoy itudlo ni PRRD nga mopuli sa nagdumala sa Mindanao Development Authority (MinDA) nga mitaliwan na.

Apan bisan pa sa nanggawas nga mga balita, wala pay migawas nga Order gikan ni PRRD nga nagtudlo kang Pinol sa MinDA.

Sama nga wala pay order si PRRD kon kinsa gyod ang mopuli kang Pinol isip kalihim sa Department of Agriculture.

Dunay tulo ka mga pangalan nga gusto ni Pinol nga maoy mag OIC sa DA alang sa usa ka bulan nga “transition period.”

Sila mao si USec Waldo Carpio, USec Ariel Cayanan ug USec Francisco Villano Jr.

Kining mga “insider” nga mga gi-rekomenda ni Pinol magseguro nga hapsay ang pagsulod sa bag-o nga itudlo nga kalihim sa DA.

Apan hangtod karon, wala pay klaro kinsa kanilang tulo ang molingkod isip OIC.

Pagka-liboga.

Kon pulihan man gani si Pinol isip kalihim sa DA, angay unta mahibaw-an sa labing madaling panahon kon kinsa ang mopuli kaniya.

Daghang mga opisyales karon ang naglibog.

Bisan kon padayon gihapon ang paghimo ni Pinol sa iyang katungdanan isip kasamtangang kalihim sa DA, dili pa klaro kon ang iyang gihimo o ipahimo sa iyang mga sakop ipadayon pa ba sa mopuli kaniya.

Kon imong ayohon pagsabot, nindot unta kon “insider” lang ang mopuli kang Pinol.

Ngano man?

Kon “insider,” nakaila na siya sa mga kasamtangang opisyal sa DA sa tibuok Pilipinas. Nasayod na siya sa mga programa nga gipatuman ni Pinol. Dali na lang kaayo og dili na lisod alang kaniya ang pagpadagan sa DA.

Buot ipasabot, dili na siya manangtang sa mga opisyales og mga empleyado og padayon ang ilang pagserbisyo sa DA.

Kon “outsider” ang mopuli, daghan ang mahitabo.

Mag-ila ila pa siya sa mga kasamtangang kawani og mga opisyales sa tibuok departamento sa DA, apil na ang mga line agencies og bureaus.

Dili komedya kining trabahoa.

Tun-an pa niya ang mga kalihokan sa kada departamento, apil ang mga line agencies og bureaus.

Dili sab komedya kining trabahoa. Tun-an sab niya ang mga programa nga gipatuman og mga giplano nga buhaton.

Lisod kaayo kini sanglit duol na sab ang tinuig nga pagtuki sa budget sa DA alang sa sunod tuig.

Mao kini hinungdan nga sama sa tinuod ang gisulti bahin sa DA karon – gubot pas lukot ang DA.

Nindot sab ang gibuhat ni PRRD bahin sa isyo sa pagka-speaker sa House of Representatives.

Mag term-sharing na lang para patas ang labanan.

Silang tulo ni Lord Velasco, Martin Romualdez og si Peter Cayetano ang magpuli-puli og lingkod.

Matod pa, si Cayetano maoy una nga molingkod.

Duna bay mibabag gikan sa kampo sa Hugpong?

Anha nimo makita unsa ka dako ang inpluwensiya ni PRRD sa mga politiko.

Napakita na ni PRRD ang iyang abilidad sa nakalabay nga piniliay diin nahimong ika-3 sa senado ang iyang sinaligan nga si Bong Go. Midaog pa gyod si Bato dela Rosa og si Francis Tolentino.

Gawas pa niana, na zero gyod ang ocho deretso sa Liberal Party.

Unya karong bag-o pa lang, migawas sa survey ang pinaka taas nga pagsalig sa mga tawo ni PRRD.

Mao kini hinungdan nga daghan ang naghulat nga mohukom si PRRD sa isyo sa pagka-speaker.

Solbad dayon ang problema pagtingog na ni PRRD.

Related Stories

No stories found.
SunStar Publishing Inc.
www.sunstar.com.ph