DUHA ang Golden Jubilee sa Bathalan-ong Halad sa Dagang (Bathalad) Sugbo. Natukod kini sa Agusto 19, 1969. Ang unang pagsaulog niadtong Pebrero 25, sa Palm Grass Cebu Heritage Hotel sa Junquera St..
15 ka mga top writers sa siglo sa pinulongang Sugbuanon ang gipasidunggan niadto. Ning ikaduhang pagsaulog, pasidunggan ang 10 outstanding young writers sa dekada. Pilion pa ang venue.
Pahalipayan tang mga awardee nga sila Richel Dorotan, Januar Yap, Adonis Dorado, Josua Cabrera, Michael Obenieta, Kevin Lagunda, Cheeno Borden, Jeremaya Bondoc, Cindy Velasquez ug Raul Moldez.
Ang Selection Committee mao sila Dr. Mel Allego (magtutukod sa Bathalad), Lam Ceballos (kaduha namuno sa Bathalad) ug kining maglilindog nga unang pamuno. Pulos top writers sa siglo.
Duha ka puntos ang gibasehan gawas sa edad nga ubos 60. Ang kalidad sa mga sinuwat ug ang iyang partisipasyon sa promosyon ug pagpalambo sa pinulongan ug katitikan.
Si Raul Moldez award-winning writer ug nahimong pamuno sa Bathalad Mindanao. Si Cheeno Borden usa ka Palanca award- winning writer ug pamuno karon sa Bathalad Sugbo.
Samtang si Kevin Lagunda multi-awarded poet-writer ug kapila mahimong opisyal sa Bathalad ug karon puli-pamuno nga kargo sa media ug komunikasyon.
Si Jeremaya Bondoc lima ka tuig nga nanimunil sa Bathalad isip pamuno. Responsable siya sa pagmantala sa duha ka libro: Wanang ug E-Book sa mga balak. May kalidad ang iyang libro sa mga balak.
Siya kanhi SunStar Cebu in-house awardee isip article writer sa Weekend sa panahon ni Editor Mike Obenieta. Si Josua Cabrera Palanca awardee sad sa sugilanon ug dugayng namuno sa Bathalad.
Si Januar Yap katulo makadaog sa Palanca sa Sugilanon. Unang ganti siya sa miaging tuig. Nahimo siyang puli-pamuno sa Bathalad. Sa daghang higayon imbitado nga lektyurer sa literatura.
Si Dorotan usa ka multi-Palanca awardee sa sugilanon. Nagmatuto sa mga batan-ong magtatampo sa Bisaya Magasin. Siya ang literary editor sa Bisaya.