DILI bag-o ang polisiya sa pagsul-ob og helmet sa nagmotorsiklo ug ang angkas. Gihubad kini sa nasudnong balaud, ang Republic Act (RA) 10054 o “Motorcycle Helmet Act of 2009”, apan pipila ka local governent units (LGUs) nga kagamhanan ang luag sa pagpatuman niini, sama sa ubang nindot nga balaud sa nasod.
Daghang hinungdan niini. Nag-una ang kakuwang sa pagsabot sa kaimportante sa helmet alang sa kaluwasan sa mga motorista ug ikaduha mao ang walay igong personahe sa pagpastuman sa balaud.
Ang Section 7, R.A. 10054, naglatid sa silot o multa: Php 1,500 sa first offense; Php3,000 sa second offense; Php 5,000 sa third offense; ug Php 10,000 uban sa pagsakmit sa driver’s license sa fourth ug mosunod nga kalapasan.
Ang helmet kabahin sa kinatibuk-ang balaud sa pagmaneho og motorsiklo. Bisan klaro ang balaud bahin sa helmet, apan dunay LGUs nga nagtuis niini. Nipalabang og ordinansa, sama sa nagdili sa full-faced helmet. Gihimong rason aron daling mailhan ang namaneho niini dihan miuso ang krimen sa riding-in-tandem.
Ang dakbayan sa Talisay, ubos sa bag-ong liderato ni Mayor Samsam Gullas, estrikto o hugot gipatuman sa balaud sa helmet sugod kagahapon, Hulyo 9. Daghang nadakpan bisan pa sa ilang pagpahibalo daan bahin sa ilang operasyon.
Ug ang tuis sa Talisay mao nga ang mayor nitugot nga makaangkas ang bata tungod sa humanitarian nga rason. Hinuon, way ordinasa niini. Tataw nga gidili kini sa nasudnong balaud.
Samtang, ang isyu sa habalhabal wala pa masulbad.
Alang sa mga taga Talisay, gawasnong silang makapasakay sa bata sa motorsiklo, pwera lang inig labang sa utlanan sa laing LGUs. Dili ba kiwaw ug kataw-anan nga sitwasyon kon dunay lahilahing pagpatuman sa balaud labi na sa nasakop sa usa lang ka metropolitan nga dapit. Ang helmet, bow.