GIPASAKAAN nag kasong parricide sa Dumaguete City police ang amahan nga pulis nga nakapusil patay sa iyang anak babaye niadtong Dominggo sa hapon, Hulyo 7, sa Purok Bouguinvilla, sitio Canday-ong, Barangay Calindang.
Gipasakaan og kaso mao si Police Staff Sergeant Levi Ege, 54, kinsa kasamtangan nga nadestino sa Dumaguete City police station.
Iyang napusilan patay si April May Ege, 22, sa ulo gamit ang 9mm nga Glock 17 pistol nga service firearm.
Matod ni Police Lieutenant Colonel Gregorio Galsim, hepe sa Dumaguete City police station, naka duty si Ege apan mipauli kini pagka udto aron mokaon.
Giingong pag-abot sa ilang balay, sirado kini ug sa dihang nanuktok, dugay kini giablihan.
Sa dihang naablihan na sa anak ang pultahan, dinhi na nahitabo ang panaglalis sa duha.
Si Ege nikuha sa iyang armas ug dayong pusil sa anak.
Patay diha-diha si April May tungod sa igo sa ulo.
Gidakop si Ege sa ningresponding mga pulis.
“Nag-away ni sila sa anak gud mao to napusilan sa amahan,. Na file na namo ang kaso sa korte. Parricide case and after sa pag file, automatic ang isunod ang admin case,” matod ni Galsim.
Nakuha sa crime scene ang armas sa ni Ege, usa ka magazine ug upat ka bala akip na ang kabhang ug basiyo sa bala sa 9mm.
Nagtuo si Galsim nga nadala lang sa kapungot si Ege nga maoy nakatukmod kaniya sa pagpusil sa iyang anak.
Nagmahay kini sa iyang nabuhat apan wa nay mahimo pa tungod kay patay na ang anak.