TAHURON ni Mayor Edgardo Labella ang nasabotan sa Filinvest Land Inc. (FLI) ug kanhi mayor Tomas Osmeña sa pagkanselar sa kontrata sa 19 ektaryas nga yuta sa South Road Properties (SRP) nga ilang napalit niadtong 2015.
Kini ang gipadayag ni SRP manager Jose Daluz III human ang FLI nisugot sa kagustohan ni Osmeña samtang ang SM Prime Holdings ug Ayala Land Inc. nga nag-consortium para mapalit ang 26 ektaryas nga yuta sa SRP, wa nituman.
“The mayor has said to me nga ipadayon ang rescission kay mao man nay gusto sa FLI. Sila may ni-request for rescission unya gi-honor naman sa previous administration. So, the mayor (Labella) has no problem in honoring their agreement nga i-rescind lang ang contract,” padayag ni Daluz.
“Dili nalang ta mohilabot og lisodlisod sa Filinvest. Ang ato unsay ilang gusto unya mo-rescind man sila sa contract, then we will allow the recession of contract,”dugang ni Daluz.
Iyang giklaro nga mopahigayon pa sila og tigom tali sa FLI aron maandam ang tanan ug ilang sabotan kon unsay ilang buhaton sa kwarta nga nabayad sa developer.
Niadtong Pebrero 2017, ang FLI nibakwi sa ilang kontrata nga gisudlan tali sa Cebu City Government.
Ilang gihulagway nga napakyas ang Siyudad pagtuman sa ilang obligasyon subay sa kontrata nga ilang gisabotan sa pagpalit sa 19.2 ektarya nga yuta.
Niadtong panahona, si Osmeña way pagsupak.
Iyang gidayeg ang FLI sanglit nisanong kini sa iyang awhag samtang wa manumbaling ang SMPHI ug ALI nga niadtong panahona iyang gigukod gumikan sa isyu sa buhis.
Ang FLI niadtong panahona niingon nga ang mayor ( Osmeña) nitahas sa city officials ug representante sa FLI para paghan-ay sa mga gikinahanglan aron madayon ang pag-rescind sa kontrata.
Gisuwayan og kuhasa ilang habig ang FLI, apan sa pagsuwat ning taho, wa pa silay tubag.
Si Osmeña gusto nga iuli ngadto sa FLI ang P4.5 bilyones nga kwarta nga 50% downpayment sa developer nga hangtod karon naa pa sa panudlanan sa Dakbayan sa Sugbo.
Gibarogan ni Osmeña nga illegal ang pagbaligya sa 45.2 ektaryas sanglit adunay ordinansa nga mabaligya lang ang SRP lot pinaagi sa ordinansa.
Apan nabaligya ni kanhi mayor Michael Rama ang mga luna bisan resolution ra ang gipalabang sa konseho.
Apan gi-resolbar kini sa korte nga niingon nga legal ang pagbaligya nga gipahimug-atan usab sa Court of Appeals.
Si Daluz nagkanayon nga ipadayon sa kasamtangang administrasyon ang mga proyekto nga gustong himuon sa SMPHI ug ALI may labot sa ilang napalit nga yuta.
“The mayor has already talked to the owners of SM and they will cooperate and coordinate with us nga masugdan dayon ang construction and development sa 26 hectares,” padayag sa SRP Manager.