SUKAD nga gimando ni Presidente Rodrigo Duterte ang pagsirado sa tanang investment schemes, ang Davao City Anti-Scam Unit (ASU) nakadawat na og walo ka mga reklamo.
Sumala ni ASU chief Simplicio Sagarino, unom sa walo ka mga nagreklamo di molupyo sa dakbayan.
Dugang pa niya nga ang mga nagreklamo nagagikan sa Midsayap sa North Cotabato, ug Tagum City kon diin walay mga anti-scam units sa ilang lugar.
Matud ni Sagarino nga mga nagreklamo wa makadawat og “pay outs” gikan sa mga investment firms.
Sa mga nagreklamo, usa niini ang retiradong magtutudlo gikan sa North Cotabato, nagbubo og P2.4 milyon sa Everarm Marketing.
Sa dihang gipangutana sa ASU ang mga nagreklamo, nasayran nga ilang gipasaka ang ilang reklamo dinhi sa dakbayan tungod nagtuo sila nga si Davao City Mayor Sara Duterte-Carpio makatabang kanila sa ilang problema.
“Dako ilang pagsalig sa atong mayor ug sa atong Presidente,” matud ni Sagarino.
Sa pagkakaron, giproseso na sa ASU ang mga referral documents aron nga itunol ang reklamo ngadto sa National Bureau of Investigation (NBI) alang sa dugang imbestigasyon.
Mahimong makadawat pa ang ASU og laing reklamo gikan sa mga biktima sa investment firms sa bisan unsang panahona.
Samtang gitug-an sa opisyal nga ang ASU padayon karon nga nagmonitor sa 16 ka kompaniya nga ilegal nga naghanyag og investment schemes nga posibleng mosulod sa dakbayan, subay sa mando sa Securities and Exchange Commission.
Kahinumdoman nga ang yunit nipagawas og cease and desist order (CDO) ngadto sa mga kompaniya sa Rigen Marketing, Jogle Marketing, ug Organico.
Mga nahisgutan, sumala kang Sagarino, wala pa moduso og mga gikinahanglan nga permits sama sa business permit gikan sa City Mayor’s Office, Department of Trade and Industry, ug sa Bureau of Internal Revenue.
“Basin nanirado na gyud to sila kay wala naman sila namalik aron mo-comply sa ilang permit, pagtuo niya. (Cristita L. Canoy/MSU intern ug Ralph Lawrence G. Llemit)