MGA duwa karon:
4:30 pm- Rain or Shine batok Magnolia
6:45 pm- San Miguel batok Phoenix
Manikaysikay ang nagsalimoang nga San Miguel Beermen nga makakumpayot pa og luna sa quarter-finals sa ilang pagpakigbatok sa Phoenix Pulse Fuel Masters sa main game karong gabii sa Philippine Basketball Association (PBA) Commissioner’s Cup sa Araneta Coliseum.
Ang multi-titled Beermen, nga mao unta ang usa sa labing gikahadlukang puwersa sa liga, wala damhang nagkagidlay ning maong komperensiya ug kasamtangan kining nagbitay sa ikasiyam nga dapit dala ang 3-5 nga rekord.
Hinuon aduna pa’y nahabiling tulo ka mga duwa ang Beermen - lakip na ning kombatiha – aron makabangon gikan sa kasamtangan nilang nahimutangan.
Ang Fuel Masters naa sa ikapitong dapit dala ang 4-5 nga rekord.
Kon modaog ang Beermen karon, hayan temporaryo na silang makasulod sa top 8 ug magbira kini sa Fuel Masters paubos sa standing.
Labing seguro, dili mosugot ang Fuel Masters nga mahitabo kini ug buhaton nila ang tanan nilang makaya aron lupigon ang Beermen aron moamag ang ilang poruhan sa playoffs.
Sa laing bahin, krusyal sab ang panagsangka sa Rain or Shine Elasto Painters ug Magnolia Ang Pambansang Manok Hotshots.
Sama sa Phoenix, ang Elasto Painters naggunit sab og 4-5 nga rekord ug delikado pa’ng matagak sa playoffs.
Ang Hotshots mas arang-arang og sitwasyon kay naa kini sa ikalimang dapit dala ang 5-4 nga rekord. (ESL)