PROBLEMANG pinansiyal maoy posibleng hinungdan sa paghikog sa negosyante nga nagpusil sa kaugalingon sud sa iyang awto, kaadlawon sa Martes, Hulyo 9.
Si P/Maj. Jaime Tolentino, hepe sa Police Station 5 sa Lapu-Lapu City Police Office, niila sa namatay nga si Roland Digamon Tacgos, 40, minyo, taga-dalan H. Abellana, Barangay Basak, Mandaue City.
Siya tag-iya sa Goldy Joro Lending Corp. nga nahimutang sa Pusok, Lapu-Lapu City.
Gikatahong nagpusil sa kaugalingon si Tacgos samtang nagmaneho sa iyangToyota Wigo, kolor gray (A6Q 684) nga nagsubay sa Marcelo Fernan Bridge.
Siya naggikan sa Lapu-Lapu side ug mopaingon sa dakbayan sa Mandaue.
Naka-angkon og samad pinusilan si Tacgos sa iyang tuo nga dughan.
Siya naabtan sa kapulisan nga naligdas na diha sa driver seat nga patay na.
Nakamugna og kahuot sa trapiko sa bridge ang hitabo gumikan sa natanggong nga sakyanan.
Nikatkat na ang usa sa ligid niini sa center island sa tunga-tungang sa tulay.
Nahipos sa imbestigador ang usa ka .380 pistol ug laing .380 revolver, 103 ka mga bala, usa ka empty shell ug suicide note nga gisuwat sa long folder ug bondpaper nga back to back ang mga sinuwat gamit ang lapis.
Ang notes gi-address ngadto sa iyang ginikanan ug nagpadayag sa iyang kapungot.
Samtang laing suwat gi-address alang kang Presidente Rodrigo Duterte nga ipaimbestigar ang iyang pamilya.
Base sa inisyal nga impormasyon sa Police Station 5 gikan sa higala ug pag-umangkon sa namatay, kinsa nagdumili sa pagpa-ila, gikan sa usa sa mga casino sa Lapu-Lapu si Tacgos.
Dako kini og pilde sa iyang pagpanugal nga gibana-bana nga moabot og P100,000.
Naabtan sa Superbalita Cebu ang duha ka mga kolektor ni Tacgos sa iyang lending company sa police station nga nagpahibawo.
“Nagbilin man to si sir (Tacgos) og note sa opisina nga ipakolekta tong mga nanghuwam sa lending,” matod sa kolektor nga wa magpaila.
Nasuta sab nga di na maayo ang dagan sa negosyo niini nga lending company.
Padayon pang gisuta sa kapulisan kon aduna bay foul play ang kamatayon ni Tacgos. (FVQ)