BUOT sa tsirman sa social services nga panghingusgan ang paghatag og libreng legal nga serbisyo ngadto sa mga naabuso.
Nasayran nga atol sa kampanya kini ang gipanghingusgan ni Joyleen Mercedes “Girlie” Balaba nga itunol nga serbisyo kung modaug hinungdan nga karon buot niini nga hingpit na nga mapatuman.
Gibutyag ni Balaba nga istudyohan niini aron nga mapatuman na ug mapahimoslan na kini nga programa sa mga Kagay-anon ilabi na nga daghan ang dili makabayad og alang sa abogado panahon nga kini giabusohan.
Gidugang pa niini nga duna nay libreng legal nga serbisyo nga gihatag ilabi na sa Public Attorney’s Office (PAO) apan alang lamang kini ngadto sa mga indibidwal nga giila nga miyembro sa Indigenous People (IP).
“Duna pud ta’y kababayen-an nga biktima sa pagpangabuso nga dunay igong panginabuhi-an, dunay sweldo pero ilahang kwarta igo lang gyud sa pang adlaw-adlaw nga panginahanglanon pero wala silay igong kwarta nga makabayad sa abogado,” matud ni Balaba.
Gidugang pa usab niini nga buot niini nga mapalabang alang sa kabataan ug kababayen-an nga matagaan og libreng legal nga serbisyo.
“Kining five special council atoa ning iduso bayad siya sa city government pero ang iyahang serbisyo iyahang legal services alang sa katawhan ilabi na gayud sa kababayen-an ug kabataan,” dugang ni Balaba.