KUMPIYANSA si kapitan Max Rodriguez III sa Barangay Nazareth nga mahinayon ang ilang katukoran sa P21 milyon balor sa Nazareth Barangay Hall nga giingong alang sa serbisyo ug panarbaho sa katawhan sa barangay.
Gibutyag niini nga aduna silay mga papeles ug nahisubay sa balaod.
Niaging tuig pa ilang gisilbihan og notice to vacate ang Tennis Club apan nagmagahi.
“Last November 30, nag-serve ta og notice to vacate. We give them 30 days. After nag-lapse, wala nato gi-implement in the spirit of Christmas, then na delay man ang national budget, so gipasagdan sa sila but karon naa naa budget, kailangan na gyud nato mag-take possession,” pasabot ni Rodriguez.
Apan dihang ila kining gi serve niadtong July 5 nagmagahi ang kampo sa tennis club.
Dinhi sab nila nasusihan nga adunay mga “ilegal bar ug videokihan’ sa sulod nga usa ka dakong kasupakan sa ordinansa sa barangay.
Niini buot ni Rodriguez kauban ang ilang legal team mopasaka og kaso sa club president nga mao sila si Charles Mejia, abugado nga si Tibs Palasan ug John Elago tungod sa dili pagbalhin lakip ang mga dili maayong pulong labina diha sa social media.
“When we gave our executive order to take over, naay gamay tension pero I instructed the police to exert maximum tolerance gani naa ra sila sa gawas. Kabalo ang City Government kay we gave them the EO (executive order) apil ang DILG (Department of the Interior and Local Government) atong gihatagan,” pagpasaboy pa niini ug miingon nga ilang giila ang barangay nga tag-iya niini apan ang ilang barangay adunay dakong katungod.
Dugang ni Rodriguez nga mando ni Presidente Rodrigo Duterte magtukod og barangay hall aron paspas ang serbisyo rason mao kini nga katukoran.
Kung ang kagamhanan sa siyudad sa dili gyod morekognisar niini gibutyag ni Rodriguez nga andam siyang magpatabang ug modangop sa kaulohan.
Gani ang Department of Public Works and Highways (DPWH) nga moimplementar sa three-story barangay building naghatag na og notice to proceed kini hilabina nga na download na ang budget niini.
“Lawful ni nga move kay ang DPWH will not approve a project kung kulang ang requirements and documents,” pasabot niini.
Gawas niini gikapoy na sila sa daghang violation sulod sa tennis club ug giingong mga ilegal nga kalihokan niini.
Gani nihangyo kini sa siyudad nga mohatag og laing luna aron mabalhinan sa Tennis Court hilabina nga wala na silay makita nga bakante nga luna sa barangay.
Sa iyang bahin ni Charles Mejia iyang gibutyag nga magpasaka sab sila og sumbong batok kang Rodriguez gumikan sa pwersadong pagkandado sa tennis court lakip na ang giingong pagsagpa sa mga nakabonnet sa ilang mga care taker.
Gibutyag sab ni Mejia nga ang City Government lang makasulti kung mohawa sila kay sila maoy nanag-iya niini gawas niini 49 na kini ka tuig nga wala sukad gipahawa sa mga niaging pamunoan.
Dugang niini daghan sa mga kabatan-onan nahilayo sa druga ug nagdako nga dinhi magbansay labina kung adunay mga kompetisyon.