GILAYOG sa unang asawa ang usa ka babaye kinsa giingong ikaduhang asawa human nag-krus ang ilang mga dalan niadtong nilabay nga adlaw gawas nga bahin sa mall nga nahimutang sa Lapasan, dakbayan sa Cagayan de Oro.
Nagpatala si Leah (dili tinuod nga ngalan), 28, minyo, second wife ug residente sa Barangay Balulang ning dakbayan samtang ang unang asawa mao si Monairah (dili tinuod nga ngalan), 46, 1st wife ug residente sa Opol, Misamis Oriental kinsa pulos nagdala sa apilyedo sa ilang usa ka bana.
Sa nahipos nga impormasiyon gikan sa Police Station 2 (PS2) sa Cogon, giingong nag-abot ang duha ka mga asawa sa gawas nga bahin sa usa sa mga dakong mall.
Gibutyag ni Leah nga gi-harass kini ni Monairah ug gibira ang iyang buhok ug di pa igo gikawras pa ang iyang dagway rason nga nidangop sa buhatan sa kapulisan.
Ang maong insidente ang nakatala na sa buhatan sa kapulisan alang sa tukmang disposasiyon.