NAKABSAN sa kinabuhi ang usa ka 16 anyos human nabangga ang gimanehong
motorsiklo niadtong nilabayng adlaw mga alas 11:50 sa gabii didto sa Barangay Poblacion, lungsod sa Alubijid, Misamis Oriental.
Giila ang biktima nga mao si Jeffrey Amorga, 16, lumad nga taga lungsod sa Binuangan, Misamis Oriental.
Kritikal usab ang kahimtang sa angkas niini nga giilang si Daniel Naot, 18, ulitawo sa susamang dapit.
Nasayran nga adunay importanteng gilakaw ang mga biktima sa lungsod sa Alubijid dihang kalit lang nga mabangga sa laing motorsiklo nga giingong niliko og kalit niadtong tungora.
Tungod sa kusog nga pagsungag, nilagpot ang mga sakay sa motorsiklo ug nabunal ang ulo.
Si Amorga nga nagrabehan tungod sa nakaangkon nga grabeng bun-og sa lawas gani nagsuka pa og dugo.
Pipila ka oras dihang girespondehan sa Alubijid Police Station ug gidala sa Northern Mindanao Medical Center (NMMC) ang biktima.
Ning panahona nagpabilim pa sa balay tambalanan ang angkas sa biktima nga padayon gihapong giobserbahan sa mga doctor.
Samtang ang gikasungag nga motorsiklo anaa gidala sa laing balay tambalanan ning siyudad. (Stephanie V. Berganio)