Tomas Oppus, Southern Leyte map. (Google Maps)
Tomas Oppus, Southern Leyte map. (Google Maps)

Bise mayor mi-resign

TOMAS Oppus, Southern Leyte - Bise mayor ning lungsod sa lalawigan sa Southern Leyte nikanaog sa iyang pwesto.

Si Bise Mayor Rey Asterio Tambis, kinsa napili niadtong Mayo nga eleksyon sa lungsod, niluwat og resignation sa miaging semana.

Nadawat sa opisina ni Southern Leyte Governor Damian Mercado ang resignation, Huwebes, Hulyo 4, 2019.

Matod sa suwat ni Tambis, may labot sa iyang panlawas ang rason sa iyang pagkanaog sa pwesto.

“It is with deep regret that I inform your good office that I would like to resign as municipal vice mayor effective immediately due to health reasons,” tipik sa suwat ni Tambis.

Dugang ni Tambis, tutokan usab niya ang iyang negusyo sa Cebu diin may partnership sa usa ka foreign company nga gikinahanglan nga mahuman ang ilang proyekto sa Oktubre ning tuiga.

Gitumbok ni Tambis nga lisud alang sa iyang panglawas ang pagsige og biyahe gikan sa Southern Leyte paingon sa Cebu ug Cebu pauli.

“The rigors of travelling to and from Leyte would be detrimental to my health as I am now taking maintenance medicines for my hypertension,” dugang sa suwat ni Tambis.

Gipasabot usab ni Tambis nga di niya kaya isakripisyo ang iyang panlawas kay basin maapektuhan ang iyang trabaho isip bise mayor.

Si Municipal Councilor Nic Tahup ang nilingkod karon nga bise mayor sa lungsod diin siya napili isip first councilor.

Giangkon ni Tahup nga nakurat sila sa desisyon sa bise mayor kinsa iyang gihulagway nga maayo nga lider ug dunay dakong panlantaw sa lungsod.

Dugang ni Tahup, ilang ipadayon ang ilang priority projects may labot sa turismo.

Related Stories

No stories found.
SunStar Publishing Inc.
www.sunstar.com.ph