GITAN-AW ang fault electrical wiring sa galley nga rason sa sunog sa m/v Trans Asia 1, Miyerkules sa kaadlawon, Hulyo 10, 2019.
Usa usab ang naangol atol sa maong sunog diin dali kining gidala sa tambalanan.
Alas 3:48 sa kaadlawon niadtong Miyerkules dihang nakadawat ang Coast Guard Central Visayas og alarma kabahin sa sunog sa maong barko nga nakadunggo sa FF Cruz Wharf, Pier 8, Dakbayan sa Mandaue.
Daling niresponde ang Coast Guard diin nagpadala dayon kini sa ilang barko nga MRRV 4406 (BRP Suluan) inubanan sa Coast Guard Special Operations Team, Medical and Caost Guard Environmental Protection Unit.
Alas 4:20 dihang nasuta sa Coast Guard Environmental Protection Unit and Coast Guard divers nga wala'y hulga nga oil spill sa maong insidente.
Gihatagan usab og medical assistance ang Apprentice Mate nga si Gleen Ligit kinsa nakaangkon og minor injury sa iyang ulo.
Base sa pakisusi sa Coast Guard, naparok kini atol sa maong insidente sa sunog.
Alas 6:01 dihang gideklarar sa Bureau of Fire Protection (BFP) 7 nga under control na ang maong sunog.
Base sa operations officer sa Trans Asia nga nagsugod ang sunog sa galley air blower sa maong barko.
Luwas ra hinuon ang tanang 35 ka mga tripolante niini.
Nasayran nga si Kenneth Oyangorin ang kapitan sa maong barko.
Gikatakda nga mosumiter ang master sa maong barko og Marine Protest ngadto sa Maritime Industry Authority. (Superbalita Cebu)