USA ka lalaki ang gisikop human niya gidabdaban ang ilang kaugalingong balay tungod kay wa nagloto og pagkaon ang iyang kapuyo didto sa lungsod sa Laak, Compostela Valley Province.
Ang suspek mao si Renato Bautista, 40, ug molupyo sa Purok 11, Barangay San Antonio sa maong lungsod.
Sumala sa report, gisikop sa mga mirespondeng sakop sa Laak Municipal Police Station ang suspek human niya gidabdaban ang ilang balay.
Pasado alas 7:00 sa gabii, Lunes, miabot sa ilang balay ang suspek gikan sa iyang lakaw.
Apan kalit kining nasuko tungod kay iyang nasuta nga nagluto og pagkaon ang iyang kaipon.
Sa iyang kapungot, gibuboan sa suspek og gas ang atop sa ilang panimalay, dayon gidagkutan.
Tungod kay ginama lamang sa kahoy ang ilang panimalay, paspas nga mikuyanap ang kalayo, gilamoy niini ang tibuok balay.
Gibana-bana nga ang sunog midanyos og kapin P10,000.00.
Ang suspek, dali sab nga gisikop sa mga otoridad ug gipaslak sud sa selda.
Gihikay na sab sa kapulisan ang kasong arson nga ipasang-at batok sa suspek.
Dugang imbestigasyon gihimo sa mga otoridad bahin sa nahitabong pagpanunog.