USA ka traffic enforcer ang naunay sa pagkasikop sa kaubanan niini sa City of Talisay Traffic Operations Development Authority (CT-Toda) tungod nasakpan kini nga wala nagsul-ob og helmet.
Ang rason sa maong enforcer, nakalimot siya og dala sa iyahang helmet apan wala kini pasayloa sa kaubanan.
Ang 40-anyos nga enforcer nakuhaan og hulagway sa usa ka Talisaynon, Martes sa buntag, Hulyo 9, 2019 atol sa unang adlaw sa istrikto nga pagpatuman sa palisiya nga "No Helmet, No Driving."
Gitug-an ni Jonathan "Joy" Tumulak, pangulo sa CT-Toda, nga usa ka inspector ang enforcer, kinsa tigbantay sa kaubanan nga enforcer kon anaa ba sila sa mga assigned area. Mo-duty ang maong enforcer alas 6 sa buntag hangtod sa alas 2 sa hapon.
Sa kuha nga hulagway sa usa ka concerned citizen, wala naka-helmet ang enforcer sakay ang motorsiklo sa departamento, sa may intersection sa Barangay Dumlog ug Barangay Isidro. Nakasulob usab siya sa uniporme sa CT-Toda.
Ang maong hulagway gi-forward sa netizen ngadto kang Mayor Gerald Anthony Gullas ug mao'y nipahibalo sa CT-Toda.
Hinungdan nga Miyerkules sa buntag, Hulyo 10, atol na sa pag-duty sa maong enforcer, gisikop kini ug gi-isyuhan og cititation.
Pabayron ang enforcer sa multa nga P500 ug dili pahangyuon.
Gipasabot ni Tumulak nga ang anaa sa ordinansa, P500 ang bayrunon sa kalapasan sa wala mag-helmet nga motorista ug angkas niini sa kadalanan sa Dakbayan sa Talisay.
Matud ni Tumulak, wala na kini gihimakak pa sa enforcer. Namahayag siya nga nakalimot siya og dala sa iyang helmet ug nakalimot nga Hulyo 9 ang istrikto nga pagpatuman sa balaod kalabot sa pagsul-ob og helmet.
Nagpadayon pa kini sa iyang pagka-enforcer ug nagpaabot si Tumulak sa mahimo nga desisyon ni Gullas, kinsa tua pa sa kauluhan alang sa pagtambong sa tulo ka adlaw nga orientation sa iyang pagka-chief executive.
“Wala nato gipasaylo, bisan kon niangkon siya kay sa mando ug pahinumdom sa atong mayor ug sa pagpaubos nato kanila sa seminar niadtong Lunes nga dili sila exempted sa balaud. Sila unta ang mahimo nga ehemplo sa uban nga mosunod sa lagda,” pasabot ni Tumulak. (SunStar Cebu)