NASAYRAN na sa mga otoridad kung diin gipalit sa duha ka wala mailhing mga tawo ang cellular phone nga gigamit nga triggering device sa improvised explosive device (IED) nga gitanom sa comfort room City Hall niadtong Pebrero 25, 2010.
Ang cellular phone giingon nga gipalit sa duha ka mga tawo sa usa sa mga pawnshop dinhi sa siyudad niadtong Pebrero 24.
Ang hulagway sa duha ka mga tawo nakuha sa mga otoridad gikan sa record sa Closed Circuit Television (CCTV) Camera nga gimuntar sa maong pawnshop sa dalang Ilustre.
Mga hulagway gipakita sa mga otoridad atol sa gihimong press conference kagahapon didto sa Davao City Police Office (DCPO) nga gitambongan ni DCPO Director Rene Aspera, Task Force Davao chief Colonel Oscar Lactao ug mga intelligence officers sa Philippine National Police (PNP) ug Armed Forces of the Philippines (AFP).
Dihang gipangutana ang mga otoridad kung tinuod nga ang SIM card sa cellular phone nakahimo sa pagtawag sa numero sa usa ka kongresista ug anak niini, si Aspera nagbutyag nga dili pa nila panganlan ang tag-iya sa mga numero nga nag-missed call sa maong SIM card.
"Tinawagan namin ang lahat ng numero pero out of coverage area. Tinawagan namin ang number ni Erwin (0910-8962691) at kay Nono (0909-8424750) pero walang sumagot," ni Aspera.
Si Aspera nagbutyag sab nga ilang gitawagan ang numero nga nag-missed call sa maong SIM card apan wala gihapoy mitubag sa mga numero nga 0921-2741913 ug 0928-2145540.
"We have this number and if you have also this number to know personalities, then you can compare it," pahayag ni Aspera kinsa nagsulti nga dili pa nila matino kung kinsa nga grupo ang naghimo sa bomb scare didto sa City Hall ug Central Bank.
Kahinumdoman sa programa sa telebisyon nga "Gikan sa Masa Para sa Masa" sa ABS-CBN, si Mayor Rodrigo Duterte nagbutyag nga ang SIM card sa cellular phone nga gigamit isip triggering device nakahimo sa pagtawag sa numero sa usa ka congressman ug sa anak niini.
"Kadtong bomba is meant to scare the poeple. Ug ang SIM pack naay mga numero sa usa ka congressman. Naay unom ka mga phone calls nga ang gi-dial nga numero mao ang numero sa anak og congressman," pahayag ni Duterte kinsa miangkon nga nakalusot ang nagdala sa bomba tungod kay walay gidid-an nga mga tawo nga mosulod sa comfort room sa City Hall.
Ang mayor nagbutyag nga ang numero sa maong cellular phone wala makahimo og tawag sa gawas sa siyudad mao nga layo ang posibilidad nga mga terorista ang naghimo sa maong bomb scare.
"Kadto nga number walay tawag outside Davao City. Ang significant adto, ngano nga kadto nga numero gikontak sa numero sa Congressman ug anak sa Congressman. Dili na nako i-elaborate basta migawas ang numero sa congressman," pahayag ni Duterte. (AD)