MAS nagkainit pa karon ang sitwasyon sa pulitika dinhi sa probinsya sa Davao del Sur, human gikiha og kasong "double insertion" si Governor Douglas Cagas nila ni kanhi 2nd District Rep. Claude Bautista, Atty. Jerome Undalok ug Sta. Maria Mayor Rody Mariscal ug uban pa kinsa giingong pulos kandidato ilawom sa partidong Nationalist Peoples Coalition (NPC).

Mismong si Cagas ang nagpahayag nga siya gikasuhan nila Bautista hinungdan nga dali niyang gidepensahan ang iyang kaugalingon didto sa iyang istasyon sa Charm Radio.

Giingong nahimo ang pagpasaka og kaso kaniya tungod sa pasangil  nga "overpricing" sa pagpalit og yuta nga gitukoran sa multi-million project nga Davao del Sur Sports Complex nga nibalor og kapin P500 milyones.

Gawas sa alegasyong overpricing giingon sab nga laing bribery case ang giatubang sa gobernador ug anak niini nga si 1st District Rep. Marc Douglas Cagas human nakapalit ang kongresista og 7 ka ektaryang luna nga matod pa dungan nga gibayran atol sa binayranay sa luna sa sports complex.

Apan gikumpirma ni Cagas nga lima lang ka ektarya ang napalit sa iyang anak kay lahi na ang buyer sa laing duha ka ektarya.

Gipalit sa probinsiya ang 11.1886 nga ektarya sa kantidad 11,188,600 milyones gikan sa pamilyang Almendras kinsa giingong paryente ta sab sa gobernador.

Apan si Cagas nagpahayag nga wa siya nahadlok sa maong kaso nga gipasang-at didto sa Ombudsman sanglit kumpleto siya og mga dokumento ug niagi kini sa saktong proseso.

"Gitugtan na siya sa Provincial Appraisal Committee ug sa committee on ways and means," ni Cagas kinsa nidason nga gihatagan sab siya og otoridad sa mga sakop sa Sangguniang Panlalawigan ubos sa komitiba nila ni Board Member Merlin Bello, Atty. Josefina Almazan ug mga kauban.

Gani, giklaro ni Cagas nga mas barato ang pagpalit sa maong luna sanglit nahimo kining institutional ug dili agricultural.

"Kay nagtuo man gud ko nga agricultural unya institutional ra man diay. Ang kantidad man gud sa agricultural kay P2.6 million pero napalit lang nato ni P1 million per hectare," ni Cagas.

"Ang uban nag-offer og barato pero layo sa kapitolyo unya di pa gyud accessible unlike ani nga atbang ra sa capitol naa pa gyuy kalsada," ni Cagas.

Hinuon, nasayran sab sa Superbalita, nga padayong gi-kwestyon ang legalidad sa conversion sa yuta ngadto sa institutional gikan sa orihinal nga agricultural land sanglit si city administrator Steve Mayor lang ang nipirma sa pag-convert niini ilawom sa otoridad nga gihatag sa buhatan ni Mayor Arsenio Latasa.

Gidugang sa gobernador nga tuig 1975, sa dihang nag-execute siya og dead of sale pabor sa manununod sa mga Almendras diin siya mismo ang nag-notarized.

Apan niya pa sa sibya sa radyo nga 'null and void' na kini human sa lima ka tuig gumikan kay na-isyohan na og patent.

Gibarogan sa gobernador nga nangandam na siya karon sa iyang pagtubag ngadto sa buhatan sa Ombudsman.

Nakaabot sa kasayuran sa Sun. Star Superbalita nga kapin kun kulang 24 ka mga kaso ang gitakdang atubangon ni Cagas apan matod niya nga usa lamang kini ka political harrassment sa iyang mga kaatbang sanglit nagkaduol na ang piliay karong buwan sa Mayo.

Nahimo karong tanghaga sa katawhan kun di ba malangay ang pagkahumanan sa pagtukod sa maong proyekto human gipasiatab kaniadto ni Cagas nga mahuman kini karong bulana. (Orlando B. Dinoy)