MIMANDO si Gov. Gwen Garcia ngadto sa WT Construction, ang kontraktor sa pagatukuron unta nga Capitol Resource Center, nga patambakan ang kinawtan niini diha sa Capitol compound sa ilang kaugalingong gasto.
Mokabat ngadto sa P7 million ang magasto sa pagtambak sa maong lugar. Way pundo ang Kapitolyo alang niana.
Bisan niadtong wala pa siya opisyal nga mi-asumir, una nang gipahibalo ni Gov. Garcia nga dili niya ipadayon ang maong P1.3 billion nga proyekto kay dili kini maoy priority sa iyang administrasyon. Gani misang-at man siya og kaso sa Regional Trail Court (RTC) sa Toledo City aron mapahunong ang maong proyekto apan gipadayon gyud sa WT Constraction ang trabaho. Una niini, ang administrasyon ni kanhi Gov. Hilario Davide III mi-apply og P1.5 billion loan sa Development Bank of the Philippines (DBP) aron itukod sa 20 ka andana nga edipisyo. Apan wala pa ma-release ang maong kantidad sa bangko. Mokubra unta ang WT Construction sa initial payment nga mokabat ngadto sa P194 million apan nabaraw kini. Ipalusot unta kadto ni Davide sa wala pa siya mokanaug sa gahum niadtong Hunyo 30.
Ang ubang andana sa maong 20 storey building paabangan sa pribadong sektor samtang ang uban okupahan sa provincial government. Ambot kon nganong gipamugos man gyud ni Davide ang pagtukod sa maong edipisyo nga daghan man unta ang misupak niini. Gawas pa, nakasupak kini sa lagda ug wala kini pagtugot gikan sa National Historical Commission of the Philippines gumikan kay gi-deklarar man nga heritage area ang Kapitolyo.
Dili ipa-release ni Gov. Garcia ang mga ekipos sa WT Construction nga ana sa maong lugar hangtod nga dili mohimo og lakang ang maong kompaniya nga tambakan og balik ang gikawot nga luna. Puwerting alkansiha na gyud sa WT Consrruction. Nakahatag na kini og advance commission sa kanhi administrasyon. Naka-amot pa niadtong panahon sa eleksiyon unya napurnada pa gyud ang proyekto. Morag na-igo sa suntok ni Manny Pacquiao ang WT Construction. Aw, mirisi. (bobbygnalzaro@gmail.com)