Editoryal: Duha ka election sa 2022?

Editorial cartoon by Ariel Itumay
Editorial cartoon by Ariel Itumay

DUNAY balaodnon nga gipasaka karon si Senador Christopher “Bong” Go nga naglugway sa termino sa kasamtangang mga barangay officials sa tibuok nasod.

Ang maong balaodnon naglatid nga imbis sa Mayo sunod tuig ipahigayon ang piniliay sa barangay ug sa Sangguniang Kabataaan (SK), adto na kini himuon sa Oktubre 2022.

Gipasabot ni Go nga hamubo ra kaayo ang duha ka tuig nga termino, ilabi na ngadto sa mga bag-ong napiling opisyal niadtong 2018 nga piniliay, sa pagpa-implementar sa ilang mga programa ug proyekto.

Kon kahinumdoman, nauswag ang 2017 barangay ug SK elections ug napahigayon kini sa niaging tuig ubos sa hugot nga pagpaluyo ni Presidente Rodrigo Duterte.

Tungod sa postponement, nahimong duha na lang ka tuig ang usa ka termino kay mag-election na man sab sunod tuig.

Dili bag-o ang pag-uswag sa barangay elections kay nahitabo man sab kini sa mga niaging administrasyon.

Gani dihay duha ka higayon nga niabot og taglima ka tuig ang usa ka termino sa mga barangay officials tungod sa postponement.

Dunay punto ug igong basehan si Go ning iyang pagpasaka sa maong balaodnon ug dako usab ang posibilidad nga mapasar kining balaora kay daghan man usab siya og kaalyado sa balay balaoranan.

Pero wa kaha masipyat si Bong Go sa iyang kuwentada nga niining tuig 2022 gikatakda man usab ang pagpahigayon sa presidential election?

Sa ato pa kon mahinayon, dunay national elections sa Mayo 2022 ug synchronized barangay ug SK elections sa Oktubre sa susamang tuig. Duha ka eleksiyon sa usa ka tuig? Imposibli ning mahitabo.

O dili kaha nakatimaho si Go nga posibling matinuod ang gihugonhugon nga walay presidential election sa 2022.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph