ORMOC City, Leyte -- Nanawagan karon ang Department of Health (DOH) sa Eastern Visayas sa publiko sa pagbantay sa hulga sa dengue.
Kini human gideklarar sa Philippine Atmospheric Geophysical Astronomical Services Administration (Pagasa) sa hinapos sa miaging buwan sa pagsugod sa ting uwan.
Matod ni DOH Region 8 spokesperson John Paul Roca, sa pagsugod sa ting-uwan, magsugod ang hulga sa dengue.
Ang kagamhanan sa lungsod sa Sta. Fe sa Leyte nagplano nga magdeklarar og state of calamity tungod sa nagkadaghang kaso sa dengue.
Matod ni Roca, nagsugod pagsaka ang kaso sa dengue sa Sta. Fe gikan sa Mayo diin niabot na sa 120 hantud Hulyo 6, 2019.
Hinuon way namatay.
Ang mga barangay nga gigikanan mao ang San Roque, Milagro ug San Juan.
Sa 120 ka kaso, di hinuon tanan ang nagpositibo sa dengue apan giapil nalang niini ang mga tawo nga nakit-an og positibong sintomas sa sakit.
Samtang lukop rehiyon, gikan Enero hangtod Hulyo 6, 2019, niabot na sa 4,555 ang kaso sa dengue.
Sa 4,555, naitala ang 19 nga nakalas gumikan kay wa makasugakod sa epekto sa sakit.
Base sa datos, ang mga nataptan nag edad og usa ka buwan ngadto sa 86 anyos, kasagaran niini nga naigo naa sa 10 anyos ug kasagaran mga lakaki.
“Compared last year (Enero - Hulyo), we are 86 percent higher,” matod ni Roca. Pinakadaghan nga nga kaso nga naitala ang gikan sa probinsya sa Leyte.
Sa panahon sa ting uwan, dako ang posibilidad nga dunay mga stagnant water o napundo nga tubig uwan. (JKDP)