KAKUWANG sa manpower, construction materials ug equipment sa contractor nga nagtrabaho sa expansion project sa Lapu-Lapu City Hospital ang usa sa nakitang hinungdan nga langay ang paghuman sa proyekto.
Usa sab sa rason sa kalangay mao ang pag-usab sa desinyo sa hospital building nga gikan sa 2-storey original plan ngadto sa 4-storey hospital building, tug-an ni Engr. Joey Salaganting sa Civil Engineer sa Department of Health (DOH)7 Infrastructure Unit.
Nasayran nga niadtong unang quarter sa 2017 gisugdan sa MOM Enterprise, nagbase sa Nueva Ecija ang phase one sa proyekto.
Ang phase one naglangkob sa paghimo sa maong tambalanan ngadto na sa 2-storey building lakip na ang rampa nga mosumpay unta sa lang edipisyo.
Apan hangtod karon wa pa makompleto ang P19.7 million nga contract price sa maong phase one.
Saysay ni Salaganting sa Superbalita Cebu nga paglabay sa upat ka buwan nga pagtrabaho sa MOM niadtong unang quarter sa 2017 mihangyo ang local government unit ubos sa pagdumala ni kanhi mayor og karon Kongresista Paz Radaza nga i-redesign o ipa-usab ang original plan sa maong establisemento.
Gikan sa 2-storey building gihimong 4-storey ang project plan ug ang pag-increase sa service capability niini.
Matod pa ni Salaganting nga napanglantawan ni Radaza ang kabalaka nga mosugwak na unya ang gidaghanon sa mga pasyente ug publiko nga mo-avail sa services sa maong tambalanan sa paglabay sa katuigan.
“It took us months sa among revision kay na-change naman ang structural design,” matod pa ni Salaganting.
Gikan sa P19.7 milyones nga contract amount sa original design nahimo nang P21.7 milyones ang bag-ong project amount.
Hinungdan nga gilugwayan ang trabaho ngadto sa Nobiyembre 2018 gumikan sa kausaban apan base sa inspection sa DOH, hinay ang progress sa proyekto.
Nakita nga kuwang sa mga trabahante, kuwang sa materyales ug equipment ang MOM Enterprise hinungdan nga mi-isyu og notice of termination ang DOH niadtong Oktubre, 2018 apan mi-apela ang MOM Enterprise nga misaad nga tapuson ang mao nga proyekto.
Tungod niini, nipresentar ang DOH Infra Unit sa mga pamaagi aron masulbad ang maong proyekto.
Usa sa pili-anan mao nga sa higayon I-terminate sa DOH ang kontrata sa pagpatrabho sa MOM Enterprise, ilang i-assess ang nahibiling trabahuon, pagsumada sa pilay gikinahanglan pundo aron mahuman ang katukoran ug ihatag ang responsibilidad sa LGU, apan moagi pa sa taas nga proseso.
Laing option mao nga ipatiwas gihapon sa MOM ang proyekto ug pagpahigayon sa re-bidding sa laing kontraktor nga maoy mopadayon. (FVQ)