Misugo sa paghawan sa school supplies sa Kapitol, libro nailhan na?

NAILHAN na ni PGSO officer-in-charge Bernard Calderon ang kawani sa Provincial School Board nga maoy giingong nagsugo sa kawani ubos sa iyang opisina nga limpyohan o wala na’y ibilin sa mga wala mahatag nga school supplies sa miaging administrasyon.

Apan sama sa kawani nga maoy direktang responsible sa pagpatimbang sa mga grade 3 ug grade 4 school supplies, nagdumili gihapon si Calderon pagtug-an sa identity niini samtang nagpadayon ang imbestigasyon.

Ang Provincial School Board maoy nagdumala sa distribusyon sa mga school supply sa nagkadaiyang tunghaan lukop lalawigan.

Ang kawani nga nagpatimbang sa school supplies nibakwi nuon sa iyang pamahayag nga dunay nisugo kaniya niini ug niingon nga iya lamang kabubut-on ang pagdala sa mga gamit sa eskwelahan ngadto sa junkshop.

Kung mahuman na ang iyang pakisusi, iduso ni Calderon ngadto sa Committee on Discipline and Investigation (CODI) ang report labot sa insidente.

Wala siya masayod sa posibleng tulubagon o silot ngadto sa kawani kung mapamatud-an nga sad-an kini.

Samtang gipaubos sa imbestigasyon, ang hintungdang kawani gi-pullout gikan sa PGSO warehouse sa Archbishop Reyes Avenue sa dakbayan sa Sugbo ug gipabalik sa Kapitolyo.

Matod ni Calderon, floating status usab ang maong empleyado nga kapin na sa 30 ka tuig nga nakaserbisyo sa provincial government.

Hinuon Nagdawatan gihapon siya ug sweldo samtang dili pa giimbestigar ang kakulian nga iyang gikalambigitan. (AZLG)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph