ANG Commission on Elections Comelec) En Banc niisyu na og writ of execution para sa pormal nga pag-istalar ni Konsehal Joel Garganera isip ikawalo nga mananaog pagkakonsehal sa amihanang distrito sa dakbayan sa Sugbo.
Gumikan sa lima ka pahina nga desisyon ni Chairman Sheriff Abas, matangtang sa City Council si Sisinio Andales, kinsang certificate of candidacy kauban kang kanhi konsehal Alvin Arcilla gikanselar sa Comelec 1st ug Second Division ug gipalig-on sa En Banc gumikan sa kalapasan sa three- term limit.
“The wait is finally over. I was thinking that it should have been done before the election but now I finally realized that it’s a lot sweeter,” padayag ni Garganera.
“To borrow from my topnotch lawyer friend Congressman Pablo John Garcia, he admitted that lawyers are not really good in Mathematics but he is quite surprised that a lawyer does not know how to count,” dugang ni Garganera.
Ang En Banc nimando sa paghimo og special city board of canvassers sa first district of Cebu City nga pinangulohan ni Atty. Abigail Justine Lilagan isip chairperson para pag-convene aron pag-proclaim kang Garganera.
Ang proklamasyon ipahigayon karong Hulyo 16 sa Manila.
Niadtong Hulyo 1, si Konsehal Jerry Guardo gi-proklamar usab isip ikapito nga konsehal sa samang distrito human niisyu og writ of execution ang En Banc para pagtangtang kang Arcilla.
Gumikan niini, moabot na sa 10 gikan sa 18 ka mga konsehal sa City Council ang kaalyado ni Mayor Edgardo Labella sa konseho human usab nisuporta sa administrasyon si Konsehal Dave Tumulak ug Guardo kaniya. (PAC)