Filinvest moirog sa ilang 8 ka mga poste
ANG Filinvest Land Incorporated motuman sa kamanduan ni Mayor Edgardo Labella pagsibog sa ilang dagkong mga haligi sa Il Corso sa South Road Properties (SRP).
Kini human sa gipahigayon nga tigom kagahapon tali sa kadagkoan sa City Hall pinangulohan ni City Administrator Atty. Floro Casas Jr., Atty. Jose Daluz III, manager sa SRP ug City Legal Officer Atty. Rey Gealon ug City Treasurer Atty. Jerone Castillo ug duha ka mga opisyal sa FLI.
Ang mayor, sa iyang bahin, nihangop sa maayong dagan sa ilang panagtagbo ug nagpasalamat sa kadagkuan sa FLI, kinsa partner sa Cebu City pagdevelop sa 40 ektaryas nga luna sa SRP.
“I thanked the management of Filinvest for heeding right away our directive to remove the columns and follow the existing laws especially on the setback requirement,” padayag ni Labella.
Ang mayor nagkanayon nga ang gibuhat sa Siyudad mao ang pagpakita nga mahigugmaon ang Dakbayan ngadto sa mga investor.
Apan magsilbe usab kining mensahe sa uban nga nakalimo og samang kalapasan.
“It is our intention to be a business friendly that is why before taking any drastic action we allow them to make a proper rectification to observe at all times the provision of law regarding on setback,” dugang ni Labella.
Ang FLI niingon sa ilang opisyal nga pamahayag nga sa ilang pagbutang sa estruktura, ilang gituman ang tanang mga resitos sa balaud.
Giaprobahan kini sa Office of the Building Official (OBO) ug Department of Public Works and Highways (DPWH).
Si Daluz, sa iyang bahin, nagkanayon nga ang gusto sa Siyudad adunay igong espasyo ang mga tawo nga moagi unya sa maong lugar sanglit sa pagkakaron, ang mga haligi sa Il Corso anaa tupad sa sidewalk.
Gitug-an sa SRP manager nga sa sunod nilang panagtagbo, posibleng iduso na sa FLI ang ilang bag-ong building design kansang mga haligi wa na sa kasamtangang nahimutangan.
15-day ultimatum
Ang City Legal Office nipadala og suwat ngadto kang Tristan Las Marias, FLI senior vice president sa Visayas ug Mindanao.
Sila gipahibawo nga nakalapas ang Il Corso sa Presidential Decree 1096 kun National Building Code.
Sa maong suwat, giklaro ni City Legal Officer Rey Gealon nga nasulod sa 8 metros nga setback ang mga haligi sa Il Corso.
“It is required within 15 days from receipt thereof that you remove those 8 concrete columns or post encroaching upon the sidewalk and comply with the minimum setback of 8 meters and to submit a relocation survey signed and sealed by a geodetic engineer,” tipik sa suwat nila ni Gealon ug Daluz.
Sa miaging administrasyon, ang landscape sa SM Seaside City habig sa Vestil road gipaiswag aron pagsunod sa setback, apan namatikdan sa mga tigpaniid nga wala hilabti ang mga haligi sa Il Corso.
Ang FLI kaniadto nisugot nga ikanselar ang ilang kontrata sa 19.2 hectares human nihangyo kanila si kanhi mayor Tomas Osmeña. Apan ang SM ug Ayala Land wa nisunod sa kagustohan ni Osmeña.