ANG Cebu City Government ug ARN Builders nga maoy tag-iya sa private landfill sa Barangay Binaliw nagkasabot nga ikanselar ang P65 milyones nga kontrata paglabay sa basura.
Kini ang gibutyag ni City Administrator Floro Casas Jr., human sa ilang gipahigayon nga panagtagbo niadtong Lunes, Hulyo 8.
“About sa contract nato sa Binaliw, ang among recommendation is to cancel the contract and fortunately, buotan raman sad ang taga ARN. Nisugot ra pud sila to unilaterally cancel the contract,” padayag ni Casas.
Pipila ka buwan sa wa pa ang eleksyon, ang City Government nipahigayon og public bidding para maoy labayan sa basura sa siyudad gikan sa Hulyo hangtod Disyembre niining tuig, diin ang ARN Builders maoy nakadaog.
Apan si Casas nagkanayon nga adunay legal ug environmental issue nga giatubang ang management sa private landfill human nangreklamo ang mga molupyo sa lugar ug kasikbit nga barangay gumikan sa basura.
Ang City Administrator nibutyag usab nga nisugot na ang management sa landfill nga di na sila modawat og basura gikan sa dakbayan sa Mandaue ug ubang local governments. (PAC)