BUOT sa tsirman sa social services sa Konseho nga tun-an ang Anti-Discrimination Ordinance nga dugay na nga gipatuman sa siyudad sa Davao ug iduso aron mahimo usab sa siyudad sa Cagayan de Oro.
Matud ni Konsehal Joyleen Mercedes "Girlie" Balaba nga buot niini nga mapatuman dinhi sa siyudad ang maong ordinansa ilabi na nga gihangyo kini sa Lesbian, Gay, Bisexual, and Transgender (LGBT) community ngadto kaniya kinsa magsilbing tingog usab niini nga komunidad diha sa konseho.
Giingong angayang ipasabot pa kini sa tanan ilabi na nga dunay mga sektor nga dili uyon apan dili man usab babag nga kinahanglan lamang og dugang pagpasabot.
"Dugay na ni nila nga ginapangandoy, ila gyud ning gihangyo sa atoa kay nahimo man gud tag mura'g voice para sa LGBT, mao ni ilang gipangayo sa atoa kaning anti-discrimination ordinance," matud ni Balaba.
"Pero ubang siyudad like Davao, naa na ning anti-discrimination ordinance. Mismo atong President, he was the vice mayor at that time sa Davao City, siya mismo nag-author ani," dugang ni Balaba.
Giingong angayang respetuhon ang katungod sa tanan diin walay pili sa estado sa kinabuhi ilabi na ang LGBT community sa kagawasan sa pagpadayag ug uban pa.