DUNAY naka-uniporme ug menor de edad nga nagdula atol sa pagsusi sa Regulatory and Complaint Board (RCB) sa video games center sulod sa usa ka mall niadtong Hulyo 9 diha sa Uptown Carmen, siyudad sa Cagayan de Oro.
Hugot ang kampanya sa RCB pagdili sa mga menor de edad diha sa mga internet shop, video games center panahon sa tingklase.
Gibutyag ni Atty. Edgardo "Egay" Uy, tsirman sa RCB, nga kini tungod sa hugot nga kampanya alang sa pagdili sa mga menor de edad sa mga susama niini nga dapit, ilabi na sa oras sa klase aron usab nga malikayan nga madaot ang ilang pagtuon tungod niini.
"Wala pa man nato na bisitahi ang mga video games center sa mga mall, labi na ning mga mall nga duol og mga eskwelahan, posible pag-break moanhi dinhi ang mga minors sa mga bawal nga lugar ug oras, so posible madaut sab ang eskwela," matud ni Uy.
Nagpahimangno ang RCB nga dili na baligyaan og token ang mga estudyante ug menor de edad sa oras sa tingklase.
"Warning pa lang kay ang ato ang RCB, ang City Government, we are not in the business of closing businesses or i-prohibit ang business but i-regulate lang gyud nato," dugang niini.
Nagpatapot usab og pahimangno ang RCB sa maong video games center.
Nagpasalamat usab ang RCB sa tinugyanan sa maong mall sa kooperasiyon.