SAKTONG binukbokay ang gipaabot nga masaksihan karong adlawa sa dihang suwayan paglangkat sa Sugboanong Dave Penalosa ang bakanting World Boxing Council (WBC) International featherweight title batok sa South African nga si Lerato “Lights Out” Dlamini didto sa King Abdullah Sports City sa Jeddah, Saudi Arabia.
Sa weigh-in kagahapon, ang undefeated nga Penalosa (15-0, 11 KOs) mitimbang og 125 lbs. samtang si Dlamini (12-1, 6KOs) miuntop sa 126 lbs. nga natukma sa timbang nga ilang awayan.
Ang 25-anyos nga nalakip sa ikatulong henerasyon sa Penalosa boxing clan, gihulagway nga usa ka tactician fighter nga makamaong mo-adjust sa estelo sa iyang kontra.
Gipasalig ni Penalosa nga tugob sa kulbahinam nga aksiyon, ilabi na sa unang upat ka round, ang masaksihan ning maong panagsangka nga nagsilbing supporting bout sa usa ka pinakadakong boxing promotion sa Jeddah.
Ang main event sa card mao ang panag-abot ni sa inila ug kanhi sparring partner ni Manny Pacquiao nga si Amir Khan (33-5, 20KOs) sa United Kingdom ug Neeraj Gojay (11-3, 2KOs) sa India sa welterweight division.
Sa kasamtangan, si Penalosa, World Boxing Organization (WBO) Oriental featherweight titleholder, ika-12 world ranking sa WBO ug ika-15 sa IBF samtang si Dlamini ika-11 sa WBC ug ika-14 sa IBF. (JBM)